ସ୍ୱଚ୍ଛ ଭାରତ ଅଭିଯାନ ବେଳେ ସମୁଦ୍ରରେ ବୁଡ଼ିଗଲେ ୩ ଛାତ୍ର; ନିଖୋଜ ଛାତ୍ର ଙ୍କୁ ଖୋଜିବାକୁ ଯାଇଥିବା ବୋଟ ଓଲଟିଲା ସମୁଦ୍ରରେ
ଓଡ଼ିଶା ଫାଷ୍ଟ(ବ୍ୟୁରୋ): ପାରାଦ୍ୱୀପ ଠାରେ ଆଜି ଗାନ୍ଧୀ ଜୟନ୍ତୀ ଉପଲକ୍ଷେ ପାରାଦୀପ ମ୍ୟୁନିସିପାଲିଟି ତରଫରୁ ବେଳାଭୂମିରେ ଆୟୋଜିତ ସ୍ୱଚ୍ଛ ଭାରତ ଅଭିଯାନରେ ଘଟି ଯାଇଛି ଏକ ଅଘଟଣ, ଯାହାକି ପାରାଦୀପ ଅଞ୍ଚଳରେ ଆଲୋଡନ ସୃଷ୍ଟି କରିଛି ।
ସୂଚନା ଅନୁଯାୟୀ, ପାରାଦୀପ ମ୍ୟୁନିସିପାଲିଟି ତରଫରୁ ପାରାଦୀପ ଲାଇଟ ହାଉସ ଠାରେ ଆୟୋଜିତ ଗାନ୍ଧୀ ଜୟନ୍ତୀ ସମାରୋହରେ ସ୍ୱଚ୍ଛ ଭାରତ କାର୍ଯ୍ୟକ୍ରମରେ ସହରର ସମସ୍ତ ସ୍କୁଲ ପିଲାମାନଙ୍କୁ ସାମିଲ କରାଯାଇଥିଲା । ଏହି କ୍ରମରେ ପିଲାମାନେ ସଫେଇ କାମ ସାରିବା ପରେ କିଛି ପିଲା ସମୁଦ୍ରକୁ ଗାଧୋଇବା ପାଇଁ ଯାଇଥିବା ବେଳେ ସେମାନଙ୍କ ମଧ୍ୟରୁ ୩ଜଣ ପିଲା ବୁଡି ଯାଇ ଥିଲେ ।ଏହି ଘଟଣା ଜଣାପଡିବା ପରେ ଅଗ୍ନିଶମ ବିଭାଗ କର୍ମଚାରୀ, ସି.ଆଇ.ଏସ.ଏଫ ଜବାନ, ପୋଲିସ, ସ୍ଥାନୀୟ ଲୋକ ଖୋଜା ଖୋଜି କରି ୨ଜଣ ପିଲାଙ୍କୁ ଉଦ୍ଧାର କରିଥିବା ବେଳେ, ଅନ୍ୟ ଜଣେ ଛାତ୍ର ଏବେବି ନିଖୋଜ ଅଛି । ନିଖୋଜ ଛାତ୍ର ଜଣକ ଅଂଶୁମାନ ଦାସ ଏବଂ ସେ କେନ୍ଦ୍ରୀୟ ବିଦ୍ୟାଳୟ ର ୯ବମ ଶ୍ରେଣୀ ର ଛାତ୍ର ବୋଲି ଜଣାପଡିଛି । ନିଖୋଜ ଅଂଶୁମାନ କୁ ଖୋଜିବା ପାଇଁ କୋଷ୍ଟ ଗାର୍ଡ ତରଫରୁ ଉଦ୍ୟମ ଚାଲିଥିବା ବେଳେ ,କୋଷ୍ଟ ଗାର୍ଡର ବୋଟ ଟି ସମୁଦ୍ରରେ ଓଲଟି ପଡିଥିବାର ଜଣାପଡ଼ିଛି । କିନ୍ତୁ ବୋଟ ରେ ଥିବା ସମସ୍ତ ୬ଜଣ କୋଷ୍ଟ ଗାର୍ଡ ଜବାନ ସୁରକ୍ଷିତ ଥିବା ଖବର ହସ୍ତଗତ ହୋଇଛି।