କେୱାଇସି ଅପଡେଟ୍ ନେଇ ବ୍ୟାଙ୍କ ଯିବା ପାଇଁ ଚିନ୍ତିତ କି ? ଏଥର ଘରେ ମଧ୍ୟ କରିପାରିବେ ଆପଣଙ୍କ କେୱାଇସି ଅପଡେଟ୍
ଯଦି ଆପଣଙ୍କର ଏକ ବ୍ୟାଙ୍କରେ ଏକ ଆକାଉଣ୍ଟ ରହିଛି ଏବଂ ସମୟେ ସମୟେ କେୱାଇସି ଅପଡେଟ୍ କରିବାର ଆବଶ୍ୟକତା ଅଛି। ତେଣୁ ଏହି କ୍ଷେତ୍ରରେ ଆପଣଙ୍କୁ ବ୍ୟାଙ୍କ ଶାଖାକୁ ଯିବାକୁ ପଡିବ। ଏଭଳି ପରିସ୍ଥିତିରେ ଅନେକ ଥର ଲୋକଙ୍କୁ କେୱାଇସି ଅପଡେଟ୍ କରିବାରେ ଅସୁବିଧାର ସମ୍ମୁଖୀନ ହେବାକୁ ପଡିଥାଏ। କିନ୍ତୁ ବର୍ତ୍ତମାନ ଆପଣ କେୱାଇସି ଅପଡେଟ୍ କରିବାରେ କୌଣସି ସମସ୍ୟାର ସମ୍ମୁଖୀନ ହେବେ ନାହିଁ।
କାରଣ ଭାରତୀୟ ରିଜର୍ଭ ବ୍ୟାଙ୍କ (ଆରବିଆଇ) ଗ୍ରାହକଙ୍କ ସୁବିଧା ପାଇଁ କେୱାଇସି କ୍ଷେତ୍ରରେ କିଛି ସ୍ବତନ୍ତ୍ର ବ୍ୟବସ୍ଥା କରିଛି। ଯେଉଁଥିରେ ଗ୍ରାହକ ଭିଡିଓ କଲିଂ ଜରିଆରେ ବ୍ୟାଙ୍କ କେୱାଇସି ଦେଇପାରିବେ। ଅର୍ଥାତ୍ ଗ୍ରାହକ ବର୍ତ୍ତମାନ ଘରେ ବସି ଭିଡିଓ ଆଧାରିତ ଗ୍ରାହକ ପରିଚୟ (ଭି-ସିଆଇପି) ପ୍ରକ୍ରିୟା ମାଧ୍ୟମରେ ତାଜା କେୱାଇସି ପ୍ରକ୍ରିୟା ସମ୍ପୂର୍ଣ୍ଣ କରିପାରିବେ |
ଆରବିଆଇ କହିଛି ଯେ ଯଦି କେୱାଇସିରେ କୌଣସି ପରିବର୍ତ୍ତନ ନ ହୁଏ, ତେବେ ପୁନଃ-କେୱାଇସି କେବଳ ଆତ୍ମ ଘୋଷଣା ଦ୍ୱାରା କରାଯାଇପାରିବ। ଏହି ସୁବିଧା ପାଇଁ କେନ୍ଦ୍ରୀୟ ବ୍ୟାଙ୍କ (ଆରବିଆଇ) ଦେଶର ସମସ୍ତ ବ୍ୟାଙ୍କକୁ ମଧ୍ୟ ନିର୍ଦ୍ଦେଶ ଦେଇଛି। ବିଭିନ୍ନ ନନ୍ ଫେସ୍-ଟୁ-ଫେସ୍ ଚ୍ୟାନେଲ ମାଧ୍ୟମରେ ଗ୍ରାହକଙ୍କୁ ଏପରି ଆତ୍ମଘୋଷଣା କରିବାର ବିକଳ୍ପ ମଧ୍ୟ ଦିଆଯିବା ଉଚିତ ବୋଲି ଆରବିଆଇ ପରାମର୍ଶ ଦେଇଛି। ଆରବିଆଇ କହିଛି ଯେ ଗ୍ରାହକମାନେ ଯଦି ବୈଧ୍ୟ ଦଲିଲ ଦାଖଲ କରିସାରିଛନ୍ତି ଏବଂ ଠିକଣା ବଦଳାଇ ନାହାଁନ୍ତି ତେବେ କେୱାଇସି ବିବରଣୀ ଅପଡେଟ୍ କରିବା ପାଇଁ ସେମାନଙ୍କର ବ୍ୟାଙ୍କ ଶାଖା ପରିଦର୍ଶନ କରିବା ଆବଶ୍ୟକ ନାହିଁ। ଏଠାରେ ସୂଚନାଯୋଗ୍ୟ ଯେ, ଅନଲାଇନ୍ରେ ଡକ୍ୟୁମେଣ୍ଟ୍ ଦାଖଲ କରିବା ପରେ ମଧ୍ୟ ୱେବସାଇଟ୍ ଏବଂ ମୋବାଇଲ୍ ଆପ୍ ମାଧ୍ୟମରେ ଡିଜିଟାଲ୍ ପୁନଃ-କେୱାଇସି ପ୍ରକ୍ରିୟାକରଣ ହୋଇପାରୁ ନ ଥିବା ନେଇ ବ୍ୟାଙ୍କଗୁଡିକ ବିରୁଦ୍ଧରେ ଆରବିଆଇ ନିକଟରେ କିଛି ଦିନ ହେବୂ କ୍ରମାଗତ ଭାବରେ ଅଭିଯୋଗ ହୋଇ ଆସୁଥିଲା।
ଆରବିଆଇ ଅନୁଯାୟୀ, ଗ୍ରାହକ ବର୍ତ୍ତମାନ ତାଙ୍କ ପଞ୍ଜୀକୃତ ଇ-ମେଲ ଆଇଡି, ମୋବାଇଲ୍ ନମ୍ବର, ଏଟିଏମ୍, ଅନ୍ଲାଇନ୍ ବ୍ୟାଙ୍କିଙ୍ଗ୍ କିମ୍ବା ଇଣ୍ଟରନେଟ୍ ବ୍ୟାଙ୍କିଙ୍ଗ୍, ମୋବାଇଲ୍ ଆପ୍ କିମ୍ବା ଚିଠି ମାଧ୍ୟମରେ ଘରେ ବସି ପୁନଃ-କେୱାଇସି ପ୍ରକ୍ରିୟା ସଂପୂର୍ଣ୍ଣ କରିପାରିବେ। ଏଥିରେ ବ୍ୟାଙ୍କ ଶାଖା ଯିବାର କୌଣସି ଆବଶ୍ୟକତା ନାହିଁ। ଯଦି ଠିକଣାରେ କେବଳ ପରିବର୍ତ୍ତନ ଆସେ, ତେବେ ଠିକଣାର ପ୍ରମାଣ ଏହି ଉପାୟ ମାଧ୍ୟମରେ ଦାଖଲ କରାଯାଇପାରିବ ଏବଂ ବ୍ୟାଙ୍କକୁ ଦୁଇମାସ ମଧ୍ୟରେ ଯାଞ୍ଚ ପ୍ରକ୍ରିୟା ସମ୍ପୂର୍ଣ୍ଣ କରିବାକୁ ପଡିବ। ଆରବିଆଇ ଅନୁଯାୟୀ ଗ୍ରାହକମାନେ ଭିଡିଓ କଲ୍ ମାଧ୍ୟମରେ ଏକ ନୂତନ କେୱାଇସି ପ୍ରକ୍ରିୟା ମଧ୍ୟ ସମ୍ପୂର୍ଣ୍ଣ କରିପାରିବେ। ଆରବିଆଇ କହିଛି ଯେ ବ୍ୟାଙ୍କ ରେକର୍ଡରେ ଥିବା ଡକ୍ୟୁମେଣ୍ଟଗୁଡିକ ବର୍ତ୍ତମାନର ‘ସରକାରୀ ବୈଧ୍ୟ ଡକ୍ୟୁମେଣ୍ଟର ତାଲିକା ସହିତ ମେଳ ଖାଉ ନ ଥିଲେ ହିଁ ଏକ ନୂତନ କେୱାଇସି ପ୍ରକ୍ରିୟା ଆରମ୍ଭ କରାଯିବା ଉଚିତ।