କେନ୍ଦୁଝର (ଓଡ଼ିଶା ଫାଷ୍ଟ ବ୍ୟୁରୋ): ଶୁକ୍ରବାର ବିଳମ୍ବିତ ରାତିରେ କାଞ୍ଜିପାଣି ଥାନା ଅନ୍ତର୍ଗତ ଘାଟିରେ ଏକ ଘରୋଇ ବସରେ ନିଆଁ ଲାଗି ସମ୍ପୂର୍ଣ୍ଣ ଜଳିଯାଇଛି। ବସରେ ଥିବା ସମସ୍ତ ଯାତ୍ରୀ ସୁରକ୍ଷିତ ଥିବା ଜଣାପଡିଛି।
ସୂଚନା ଅନୁଯାୟୀ, ଉକ୍ତ ବସଟି ରାଉରକେଲାରୁ କେନ୍ଦୁଝର ଅଭିମୁଖେ ଆସୁଥିଲା। ରାତି ପ୍ରାୟ ୩ଟା ବେଳେ କୌଣସି କାରଣରୁ ବସରେ ନିଆଁ ଲାଗିବା ନେଇ ଡ୍ରାଇଭର ସମସ୍ତ ଯାତ୍ରୀଙ୍କୁ ଅବଗତ କରାଇଥିଲେ। ଫଳରେ ସବୁ ଯାତ୍ରୀ ସୁରକ୍ଷିତ ଭାବେ ବାହାରିବାରେ ସଫଳ ହୋଇଥିଲେ। ସେପଟେ କେନ୍ଦୁଝରରୁ ଅନ୍ୟ ଏକ ବସ ଆସିବା ଯୋଗୁଁ ସମସ୍ତ ଯାତ୍ରୀ ସେଠାକୁ ସ୍ତାନାନ୍ତର ହୋଇଥିଲେ। ଘଟଣାସ୍ଥଳରେ କାଞ୍ଜିପାଣି ପୋଲିସ ଓ ଦମକଳ ବାହିନୀର ଅଧିକାରୀ ପହଞ୍ଚି ବସରେ ନିଆଁ ଲିଭାଇଥିବା ଜଣାପଡିଛି।