ଓଡ଼ିଶା ଫାଷ୍ଟ(ବ୍ୟୁରୋ): ଜାତିସଂଘର ଉପଯୁକ୍ତ ବିକାଶ ଲକ୍ଷ୍ୟ (ସସ୍ଟେନେବଲ୍ ଡେଭେଲପ୍ମେଣ୍ଟ ଗୋଲ୍ସ) ହାସଲ କରିବା ଦିଗରେ ଉନ୍ନତ ଓ ଉତ୍ତମ କାର୍ଯ୍ୟଶୈଳୀ ନେଇ ଗୋଆଠାରେ ଏକ ୩ ଦିନିଆ ସମ୍ମିଳନୀ ଆୟୋଜିତ ହୋଇଯାଇଛି । ଏଥିରେ ଶିକ୍ଷା ଓ ଅନୁସନ୍ଧାନ (ସୋଆ) ଡିମ୍ଡ ବିଶ୍ୱବିଦ୍ୟାଳୟ ସହ ଦେଶର ୨୦ରୁ ଅଧିକ ଉଚ୍ଚ ଶିକ୍ଷାନୁଷ୍ଠାନ ଓ ବିଶ୍ୱବିଦ୍ୟାଳୟ ଯୋଗ ଦେଇଥିଲେ । ଉପଯୁକ୍ତ ବିକାଶ ଲକ୍ଷ୍ୟ ନେଇ ମାର୍ଚ୍ଚ ୧୦ରୁ ୧୨ ଯାଏ ଗୋଆଠାରେ ଆୟୋଜିତ ଏହି ସମ୍ମିଳନୀରେ “ଗୋଆ ଡିକ୍ଲାରେସନ୍’ରେ ବିଭିନ୍ନ ବିଶ୍ୱବିଦ୍ୟାଳୟ ଏବଂ ଉଚ୍ଚ ଶିକ୍ଷାନୁଷ୍ଠାନଗୁଡ଼ିକ ସାମିଲ ହୋଇଥିଲେ ।
ପ୍ରସିଦ୍ଧ ଏଜୁକେସନ୍ ରେଟିଂସ ସଂସ୍ଥା କ୍ୟୁଏସ୍ ଆଇଗଜ୍ ଦ୍ୱାରା ଆୟୋଜିତ ଏହି ସମ୍ମିଳନୀ ପ୍ୟାକ୍ଟ ୨୦୩୦ରେ ବିଶ୍ୱସ୍ତରର ବିଶେଷଜ୍ଞ ସାମିଲ ହୋଇଥିଲେ । ନ୍ୟାସନାଲ୍ ଆସେସ୍ମେଣ୍ଟ ଆଣ୍ଡ ଆକ୍ରିଡିଟେସନ୍ କାଉନସିଲ୍ (ନାକ୍)ର ଅଧ୍ୟକ୍ଷ ଡ. ଭୂଷଣ ପଟବର୍ଦ୍ଧନ ଏହି ସମ୍ମିଳନୀରେ ଯୋଗଦେଇ ଉତ୍ତମ ଶିକ୍ଷା ନିମନ୍ତେ ଜ୍ଞାନ, କାର୍ଯ୍ୟ, ଚରିତ୍ର ଏବଂ ମାନସିକ ଶକ୍ତି ବେଶ୍ ଗୁରୁତ୍ୱପୂର୍ଣ୍ଣ ବୋଲି କହିଥିଲେ । କୌଣସି ପ୍ରକାର ପରିବର୍ତ୍ତନ କେବଳ ଶିକ୍ଷା ଦ୍ୱାରା ସମ୍ଭବ ବୋଲି ସେ ମତବ୍ୟକ୍ତ କରିଥିଲେ ।
ସମ୍ମିଳନୀରେ ଇଣ୍ଡିଆନ୍ ରେଡକ୍ରସ୍ ସୋସାଇଟିର ଉପାଧ୍ୟକ୍ଷ ଅଭିନାଶ ରାୟ ଖାନ୍ନା, ହିମାଲୟାନ୍ ଏନ୍ଭାଇରନ୍ମେଣ୍ଟାଲ ଷ୍ଟଡିଜ୍ ଆଣ୍ଡ କନ୍ଜରଭେସନ୍ ଅର୍ଗାନାଇଜେସନ୍ (ଏଚ୍ଇଏସ୍ସିଓ)ର ପ୍ରତିଷ୍ଠାତା ଡ. ଅନୀଲ୍ ପ୍ରକାଶ ଯୋଶୀ, ଇଣ୍ଡିଆନ୍ ଫାଉଣ୍ଡେସନ୍ର ପ୍ରତିଷ୍ଠାତା ସୌର୍ଯ୍ୟ ଡୋଭାଲ୍ ଏବଂ ଅଷ୍ଟ୍ରେଲିଆସ୍ଥିତ ଇଣ୍ଟର ନ୍ୟାସନାଲ ୟୁନିଭର୍ସିଟି ଅଫ କାନ୍ବେରାର ପୂର୍ବତନ କୁଳପତି ପ୍ରଫେସର ଲରେନ୍ସ ପ୍ରାଟ୍ଚେଟ ପ୍ରମୁଖ ଯୋଗ ଦେଇଥିଲେ ।
କ୍ୟୁଏସ୍ ଆଇଗଜ୍ର ମିଡିଲ ଇଷ୍ଟ, ଆଫ୍ରିକା ଓ ଦକ୍ଷିଣ ଏସିଆର ଆଞ୍ଚଳିକ ନିର୍ଦ୍ଦେଶକ ଡ. ଅଶ୍ୱିନ ଫର୍ଣ୍ଣାଣ୍ଡିଜ୍ଙ୍କ ଦ୍ୱାରା ଆୟୋଜିତ ଏହି କାର୍ଯ୍ୟକ୍ରମରେ ଉତ୍ତରାଖଣ୍ଡସ୍ଥିତ ୟୁନିଭର୍ସିଟି ଅଫ୍ ପେଟ୍ରୋଲିୟମ୍ ଆଣ୍ଡ ଏନର୍ଜି ଷ୍ଟଡିଜ୍ ଏବଂ ତାମିଲନାଡୁସ୍ଥିତ କଲସଲିଙ୍ଗମ୍ ଏକାଡେମୀ ଅଫ ରିସର୍ଚ୍ଚ ଆଣ୍ଡ ଏଜୁକେସନ୍ (ଡିମ୍ଡ ଟୁ ବି ୟୁନିଭର୍ସିଟି) କୋ-ହୋଷ୍ଟ ରହିଥିଲେ । ସୋଆର ଉପକୁଳପତି ପ୍ରଫେସର ପ୍ରଦୀପ୍ତ କୁମାର ନନ୍ଦ ଏବଂ ଅଫିସର ଅନ୍ ସ୍ପେଶାଲ୍ ଡ୍ୟୁଟି ପ୍ରୀତମ ନାୟକ ବିଶ୍ୱବିଦ୍ୟାଳୟ ପକ୍ଷରୁ ଯୋଗ ଦେଇଥିଲେ ।