ଓଡ଼ିଶା ଫାଷ୍ଟ(ବ୍ୟୁରୋ): କଂଗ୍ରେସ ସୁପ୍ରିମୋ ସୋନିଆ ଗାନ୍ଧୀ, ରାହୁଲ ଗାନ୍ଧୀଙ୍କ ସହ ଅନେକ ବରିଷ୍ଠ କଂଗ୍ରେସ ନେତାଙ୍କୁ ଭେଟିଲେ ପ୍ରଶାନ୍ତ କିଶୋର । ଖୁବଶୀଘ୍ର କଂଗ୍ରେସରେ ଯୋଗଦେବା ନେଇ ଚର୍ଚ୍ଚା । ପ୍ରଶାନ୍ତ କିଶୋରଙ୍କ ସହ ବୈଠକରେ ବରିଷ୍ଠ କଂଗ୍ରେସ ନେତା ଅମ୍ବିକା ସୋନି, ଦିଗ୍ବିଜୟ ସିଂହ, ମଲ୍ଲିକାର୍ଜୁନ ଖଡ଼ଗେ, ଅଜୟ ମାକେନ୍, କେ.ସି. ବେଣୁଗୋପାଳ ଯୋଗଦେଇଥିଲେ ।
କଂଗ୍ରେସର ଦେଶରେ ଦୟନୀୟ ସ୍ଥିତିକୁ ଦୃଷ୍ଟି ରେ ରଖି ଆଗାମୀ ୨୦୨୪ ସାଧାରଣ ନିର୍ବାଚନ ସହ ଆଗକୁ ଆସୁଥିବା ଅନ୍ୟ ନିର୍ବାଚନ ନିମନ୍ତେ କଂଗ୍ରେସ ପାର୍ଟିକୁ ନୂତନ ଜୀବନ୍ୟାସ ପ୍ରଦାନ ନିମନ୍ତେ ମୁଖ୍ୟ ଭୂମିକା ଗ୍ରହଣ କରିବା ପାଇଁ ସୋନିଆ ଓ ରାହୁଲ୍ ଗାନ୍ଧୀଙ୍କ ସହ ଏବେ ପ୍ରଶାନ୍ତ କିଶୋର ବୁଝାମଣା କରୁଛନ୍ତି। ଏକତ୍ର କାମ କରିବା ପାଇଁ ପୂର୍ବରୁ ଉଭୟ ପକ୍ଷ ମଧ୍ୟରେ ହୋଇଥିବା କେତେକ ପର୍ଯ୍ୟାୟ କଥାବାର୍ତ୍ତା ବିଫଳ ହୋଇଥିଲା। ଅପରପକ୍ଷରେ କଂଗ୍ରେସ କହିବା ଅନୁଯାୟୀ, ଆଗାମୀ ଗୁଜରାଟ ନିର୍ବାଚନ ପାଇଁ ଆଲୋଚନା ଚାଲିଛି। ଏହାଛଡ଼ା, ସେମାନେ ୨୦୨୪ ଜାତୀୟ ନିର୍ବାଚନ ପାଇଁ ନକ୍ସା ପ୍ରସ୍ତୁତି କରୁଛନ୍ତି।
ସୂଚନା ଥାଉକି, ମାର୍ଚ୍ଚ ମାସରେ ପ୍ରଶାନ୍ତ କିଶୋର ରାହୁଲ୍ ଗାନ୍ଧୀ ଓ ପ୍ରିୟଙ୍କା ଗାନ୍ଧୀ ଭଦ୍ରାଙ୍କୁ ଭେଟିଥିଲେ। କିନ୍ତୁ, ଏ ସଂକ୍ରାନ୍ତରେ କୌଣସି ଔପଚାରିକ ଘୋଷଣା କରାଯାଇ ନ ଥିଲା। ୨୦୨୦ରେ ପ୍ରଶାନ୍ତ କିଶୋର କଂଗ୍ରେସରେ ଯୋଗ ଦେବା କଥା, କିନ୍ତୁ କେତେକ ପ୍ରସଙ୍ଗରେ ମତାନ୍ତର ହେବାରୁ ଏହା ହୋଇପାରି ନଥିଲା।