ନୂଆଦିଲ୍ଲୀ : ଦେଶର ନଗଦବିହୀନ ଅର୍ଥନୀତିକୁ ବଳ ଯୋଗାଉଛି ୟୁପିଆଇ ନେଣଦେଣ । ଡିଜିଟାଲ ନେଣଦେଣକୁ ଅଧିକ ସହଜ କରିଛି । ବିଗତ ୪ ବର୍ଷ ମଧ୍ୟରେ ଭାଲ୍ୟୁ ହିସାବରେ ରିଟେଲ ଡିଜିଟାଲ ନେଣଦେଣରେ ୟୁପିଆଇର ଭାଗୀଦାରୀ ଦୁଇଗୁଣାରୁ ଅଧିକ ରହିଛି । ଅପରପକ୍ଷରେ ବ୍ୟାଙ୍କ୍, ଫିନ୍ଟେକ୍ କମ୍ପାନୀ ଓ ଏନ୍ଏଫ୍ବିସିର ଟ୍ରାଞ୍ଜାକ୍ସନ୍ ଜନିତ ଆୟ ହ୍ରାସ ପାଇବାରେ ଲାଗିଛି । ମୁକ୍ତ ଓ ସହଜ ପ୍ରଣାଳୀ ଯୋଗୁଁ ୟୁନାଇଟେଡ୍ ପେମେଣ୍ଟ୍ ଇଣ୍ଟରଫେସ୍ (ୟୁପିଆଇ)ର ଆଦର ବୃଦ୍ଧି ପାଇବାରେ ଲାଗିଛି ।
୨୦୨୧-୨୨ର ପ୍ରଥମ ୯ ମାସରେ ବ୍ୟକ୍ତିଠାରୁ ବ୍ୟକ୍ତି ବର୍ଗରେ ୟୁପିଆଇର ଭାଗୀଦାରୀ ୪୨%କୁ ବୃଦ୍ଧି ପାଇଛି ଯାହା ୨୦୨୦-୨୧ରେ ୨୮% ଥିଲା । ଅପରପକ୍ଷରେ ଭାଲ୍ୟୁ ହିସାବରେ ଗତ ଫେବୃଆରୀରେ ହିଁ ପାଖାପାଖି ୮୦% ରିଟେଲ୍ ପେମେଣ୍ଟ ଡିଜିଟାଲ୍ ଜରିଆରେ ସମ୍ପନ୍ନ କରାଯାଇଛି । ଏହି ତଥ୍ୟରେ ଆଇଏମ୍ପିଏସ୍ ଓ ନେଫ୍ଟ ସାମିଲ୍ ନାହିଁ । ସୂଚନା ଅନୁସାରେ ୟୁପିଆଇ ନେଣଦେଣ ଗତ ୪ ବର୍ଷ ମଧ୍ୟରେ ୩୮%ରୁ ବୃଦ୍ଧି ପାଇ ୮୧%ରେ ପହଞ୍ଚିଛି । ୨୦୧୮-୧୯ରେ ୟୁପିଆଇ ନେଣଦେଣ ୩୮% ଥିଲାବେଳେ ୨୦୨୧-୨୨ରେ ଏହା ୮୧%କୁ ବୃଦ୍ଧି ଘଟିଛି ।