ମୁଖ୍ୟମନ୍ତ୍ରୀଙ୍କୁ ଗୃହବନ୍ଦୀ କରି ରଖିଛନ୍ତି ୫ଟି ସଚିବ : ଲକ୍ଷ୍ମଣ ଟୁଡୁ

ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ୫ଟି ସଚିବ ଭି. କେ ପାଣ୍ଡିଆନ ଗୃହବନ୍ଦୀ କରି ରଖିଛନ୍ତି। ୫ଟି ସଚିବଙ୍କୁ ନେଇ ରାଜ୍ୟ ରାଜନୀତି ସରଗରମ ଥିବା ବେଳେ ଏଭଳି ଅଭିଯୋଗ କରିଛନ୍ତି ପୂର୍ବତନ ସାଂସଦ ଲକ୍ଷ୍ମଣ ଟୁଡୁ।

ଲକ୍ଷ୍ଣଣ ଟୁଡୁ ଆହୁରି ମଧ୍ୟ ଅଭିଯୋଗ କରିଛନ୍ତି ଯେ, ପାଣ୍ଡିଆନ୍ ଉପ-ଜିଲ୍ଲାପାଳ ଥିବା ସମୟରେ ମୟୂରଭଞ୍ଜରେ ଖଣି ସମ୍ପଦ ଲୁଟ୍ କରିଥିଲେ ବୋଲି ସେ ଅଭିଯୋଗ କରିଛନ୍ତି। ସେ କହିଛନ୍ତି ଯେ ଏବେ ଓଡ଼ିଶାରେ ତାମିଲ ଶାସନ ଚାଲିଛି ଏବଂ ସେମାନେ ରାଜ୍ୟକୁ ଲୁଟୁଛନ୍ତି।

ଟୁଡୁ ଅଭିଯୋଗ କରିଛନ୍ତି, ନବୀନ ପଟ୍ଟନାୟକଙ୍କ ସରଳତା, ବୟସ ଓ ସ୍ୱାସ୍ଥ୍ୟାବସ୍ଥାର ଫାଇଦା ଉଠାଇ ଭିକେ ପାଣ୍ଡିଆନ୍ ମୁଖ୍ୟମନ୍ତ୍ରୀଙ୍କୁ ଗୃହବନ୍ଦୀ କରି ରଖିଛନ୍ତି। ସେ ଆହୁରି ଅଭିଯୋଗ କରିଛନ୍ତି ଯେ, ୫ଟି ସଚିବ ମିଛ କହୁଛନ୍ତି ଯେ, ମୁଖ୍ୟମନ୍ତ୍ରୀ ତାଙ୍କୁ ରାଜ୍ୟର ବିଭିନ୍ନ ଅଞ୍ଚଳ ବୁଲିବାକୁ ପଠାଉଛନ୍ତି। ୫ଟି ସଚିବ ଓଡ଼ିଶାର ମୁଖ୍ୟମନ୍ତ୍ରୀ ହେବାକୁ ଆଗ୍ରହୀ ଥିବାରୁ ଆଗାମୀ ଦିନରେ ଆଉ ଏକ ମଧ୍ୟରାତ୍ରି ଅପରେସନ୍ ହେବାର ସମ୍ଭାବନା ରହିଛି।

ବାରିପଦାରେ ସାମ୍ବାଦିକମାନଙ୍କୁ ସମ୍ବୋଧିତ କରି ଟୁଡୁ ପ୍ରଶ୍ନ କରିଛନ୍ତି ଯେ, ଯେତେବେଳେ ମୁଖ୍ୟମନ୍ତ୍ରୀ ମୁମ୍ବାଇ ଏବଂ ଏପରିକି ଦୁବାଇ ଗସ୍ତ କରିବାକୁ ସକ୍ଷମ ହେଉଛନ୍ତି, ସେତେବେଳେ ଏହା କିପରି ସମ୍ଭବ ଯେ ସେ ରାଜ୍ୟବ୍ୟାପୀ କାର୍ଯ୍ୟକ୍ରମରେ ଯୋଗ ଦେବାକୁ ଅସମର୍ଥ ବୋଲି।

ବିଜେଡି ବିଧାୟକ ରାଜ କିଶୋର ଦାସ ଟୁଡୁଙ୍କ ଅଭିଯୋଗର ଜବାବ ଦେଇ କହିଛନ୍ତି ଯେ, ଏଗୁଡ଼ିକ ପାଗଳଙ୍କ କଥା ଭଳି। ସେ କହିଛନ୍ତି ଯେ ପାଣ୍ଡିଆନ ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ ଏବଂ ସେ ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ ଅନୁସାରେ କାମ କରୁଛନ୍ତି। ଶ୍ରୀ ଦାସ କହିଛନ୍ତି ଯେ ଟୁଡୁ ତାଙ୍କ ବୟାନରେ ଶାଳୀନତା ଆଣିବା ସହ ଜଣେ ରାଜନୈତିକ ନେତା ଭାବେ ତାଙ୍କ ଭାବମୂର୍ତ୍ତିକୁ କ୍ଷୁର୍ଣ୍ଣ କରୁଥିବା କୌଣସି ମନ୍ତବ୍ୟ ଦେବାରୁ ନିଜକୁ ନିବୃତ୍ତ ରଖନ୍ତୁ।

ଟୁଡୁଙ୍କ ଏଭଳି ଅଭିଯୋଗ ଓଡ଼ିଶା ସରକାରରେ ଅମଲାତନ୍ତ୍ରର ଭୂମିକାକୁ ନେଇ ପ୍ରଶ୍ନବାଚୀ ସୃଷ୍ଟି କରିଛି। ପାଣ୍ଡିଆନ ଅତ୍ୟଧିକ କ୍ଷମତାଶାଳୀ ହେବାରେ ଲାଗିଛନ୍ତି ବୋଲି କିଛି ଲୋକ ଉଦବେଗ ପ୍ରକାଶ କରିବା ସହ ମନ୍ତ୍ରୀମାନଙ୍କୁ ଅଣଦେଖା କରୁଛନ୍ତି ବୋଲି ମଧ୍ୟ ଅଭିଯୋଗ କରିଛି ବିଜେପି।