ଓଡ଼ିଶା ଫାଷ୍ଟ(ବ୍ୟୁରୋ): ସୋସିଆଲ ମିଡିଆରେ ବେପାରୀ ମନ୍ତ୍ରୀଙ୍କୁ ନେଇ ଚର୍ଚ୍ଚା । ଏହି ଖବର ଅନୁଯାୟୀ ରାଜ୍ୟର ଜଣେ ପ୍ରଭାବଶାଳୀ ମନ୍ତ୍ରୀ ଏବେ ବେପାରରେ ଲାଗି ପଡ଼ିଛନ୍ତି । ନିଜର କ୍ଷମତାକୁ ଅପବ୍ୟବହାର କରି ଲୋକଙ୍କୁ ପ୍ରଲୋଭନ ଓ ଭୟଭିତ କରି ଶସ୍ତାରେ ଜମି ହାତେଇ ନେଉଛନ୍ତି । ଉପରେ ଉକ୍ତ ଜମିକୁ ଚଢା ଦରରେ ବିକ୍ରି କରୁଛନ୍ତି । ମନ୍ତ୍ରୀଙ୍କ ପାଖରେ ଏବେ ପାଖାପାଖି ୫୫ଟି ଜମି ଥିବା କୁହାଯାଉଛି । ସେହିପରି ବିରୋଧୀଙ୍କୁ ହାତ କରି ଏକ ତେଲ ଟାଙ୍କି ହାତେଇ ନେଇଛନ୍ତି । ଖାଲି ଏତିକି ନୁହେଁ ଏକ ମନ୍ତ୍ରୀଙ୍କର ଏକ କଲ୍ୟାଣ ମଣ୍ଡପ ମଧ୍ୟ ରହିଛି । ତେବେ ମନ୍ତ୍ରୀଙ୍କ ଏହି ବେପାର ଏବେ ହାଟରେ ପଡି ଦାଣ୍ଡରେ ଗଢୁଛି ।
ସରକାରକୁ ସ୍ୱଚ୍ଛ ଓ ଲୋକାଭିମୁଖୀ କରିବା ଲାଗି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବିଧାୟକ ଓ ମନ୍ତ୍ରୀମାନଙ୍କୁ ସରଳ ଜୀବନ ଯାପନ ସହିତ ଦୁର୍ନୀତି ଠାରୁ ଦୂରରେ ରହିବାକୁ କହୁଥିବା ବେଳେ ଏହାକୁ କିନ୍ତୁ ଏହି ବରିଷ୍ଠ ମନ୍ତ୍ରୀ ମାନିବାକୁ ନାରାଜ । ନିଜେ ସରଳ ଜୀବନ ଯାପନ କରିବେ କ’ଣ ଅନ୍ୟମାନଙ୍କ ଜୀବନକୁ ଜଟିଳ କରିବାରେ ଲାଗିଛନ୍ତି । ବ୍ୟବସାୟ ନିଶା ଏତେ ମାତ୍ରାରେ ଚଢିଛି ଯେ ଜମି ବେପାରରୁ ପାଦ କାଢି ଏବେ ଛଦ୍ମବେଶରେ ତେଲ ଓ କଲ୍ୟାଣମଣ୍ଡପ ବେପାରରେ ବି ମାତିଗଲେଣି ।
ଗତ ନିର୍ବାଚନ ବେଳେ ସମସ୍ତେ ନିଜ ନିଜ କାର୍ଯ୍ୟରେ ବ୍ୟସ୍ତ ଥିବାବେଳେ ଏହି ମନ୍ତ୍ରୀ ନିଜର କ୍ଷମତାକୁ ଠିକଣା ଭାବେ ଉପଯୋଗ କରିଥିଲେ । କେନ୍ଦ୍ରୀୟ ନେତାମାନଙ୍କ ସହିତ ଭିତିରିଆ ଯୋଗାଯୋଗ କରି ରାଜଧାନୀରେ ଏକେ ତେଲ ଟାଙ୍କି ବସାଇ ଦେଇଛନ୍ତି । କାଳେ କଥାଟା ମୁଖିଆଙ୍କ କାନକୁ ଯିବ ତେଣୁ ଏହାକୁ ନିଜ ଭଣଜା ନାଁରେ କରିଦେଇଛନ୍ତି ।
ଭଣଜା ନାମକୁ ମାତ୍ର, ଅସଲ ବେପାର ଚଳାଇଛନ୍ତି ଏହି ମନ୍ତ୍ରୀ । କଳାପଇସା ଏବେ ତେଲ ପାଇପ୍ ରେ ପଶି ଧଳା ହେବାରେ ଲାଗିଛି । ସବୁଠାରୁ ବଡ କଥା ହେଲା ବିଜେଡି ନେତାମାନେ ଦଳର ଭୋଟ୍ ପାଇଁ ଲାଗି ପଡିଥିବାବେଳେ ଏହି ନେତା ଜଣଙ୍କ ବିରୋଧି ନେତାଙ୍କୁ ହାତେଇ ତେଲ ଟାଙ୍କିଟି ଏଭଳି ବାଟରେ କରାଇନେଲେ ଯେ ତାହାର କେହି ଟେର ପାଇଲେ ନାହିଁ ।
କେବଳ ତେଲ ଟାଙ୍କି ନୁହେଁ, ଭଣଜାଙ୍କ ନାଁରେ ଗଢିଉଠିଥିବା ଏହି ତେଲ ଟାଙ୍କି ନିକଟରେ ଏବେ ନେତା ଜଣଙ୍କ ୫୫ ଏକର ଜମି କିଣିବା ସହିତ ସୁଦୃଶ୍ୟ କଲ୍ୟାଣ ମଣ୍ଡପ ଟିଏ ତିଆରି କରିଛନ୍ତି । ଅବଶ୍ୟ ଏଥିପାଇଁ ଜଳ ନିଷ୍କାସନ ପାଇଁ ଥିବା ଏକ ଜୋରକୁ ପୋତି ଦେଇଛନ୍ତି । ସବୁକିଛି କାମର ଅଦୃଶ୍ୟ କାରବାର ହୋଇଛି । କେହି ଜଣେ ହେଲେ ଏଭଳି ମଣ୍ଡପ, ତେଲ ଟାଙ୍କି ଓ ଜମିକିଣା ପଛରେ ମନ୍ତ୍ରୀଜଣଙ୍କ ଥିଲେ ବୋଲି ଜାଣିପାରିଲେ ନାହିଁ ।ସରକାରୀ କାର୍ଯ୍ୟ ଅପେକ୍ଷା ବ୍ୟବସାୟରେ ଅଧିକ ମନୋନିବେଶ କରିବା ଫଳରେ ବାବୁଙ୍କୁ ଏଭଳି ସଫଳତା ମିଳିଛି । ଘଟଣାଟି ପଦାକୁ ଆସିଛି କିଛି ବିଜେପି କର୍ମୀଙ୍କ ଯୋଗୁଁ । ସ୍ଥାନୀୟ ଅଞ୍ଚଳର କିଛି ବିଜେପି କର୍ମୀ ତାଙ୍କ ନେତାଙ୍କୁ ଧରି ଏହି ମନ୍ତ୍ରୀ କିଭଳି ତେଲଟାଙ୍କି ବସାଇଲେ ଓ ଜୋର ପୋତିଲେ ତାହା କହି ବୁଲୁଛନ୍ତି । ଅବଶ୍ୟ ଏହା ବଦଳରେ ବିଜେପି ଅଧିକ ଫାଇଦା ପାଇଥିବା ସେମାନେ କହୁଛନ୍ତି ।
ଟଙ୍କପାଣିରୋଡ୍ ରେ ଥିବା ଜଣେ ବିଜେପି ନେତା ତେଲ ଟାଙ୍କି କରିବା ପାଇଁ ଆଖେଇଥିଲେ । ସବୁକିଛି ଫାଇନାଲ ହୋଇଥିଲା । ହେଲେ ଏହି ମନ୍ତ୍ରୀ ଏଭଳି ଗୋଟି ଚଳାଇଲେ ଯେ ସିଏ ବିଚରା ଶେଷ ମୂହୂର୍ତ୍ତରେ ଶିଶୁପାଳ ହୋଇଗଲେ । ଏହି ଘଟଣା ଏବେ କାନକୁ ଦି କାନ ହୋଇ ରାଜଧାନୀରେ ଚର୍ଚ୍ଚାର ବିଷୟ ପାଲଟିଛି ।
ପୂର୍ବରୁ ଜମି ବେପାର ଥିଲା, ଏବେ ତେଲ ଓ କଲ୍ୟାଣମଣ୍ଡପ ବେପାର । ନେତାଙ୍କ ବିଭାଗ ସେଭଳି ଓଜନିଆ ନୁହେଁ କି କୌଳିକ ବୃତ୍ତି ପୂଜାପାଠରୁ ଟଙ୍କାଟିଏ ଆୟ ନାହିଁ । ତେବେ ଏତେ ସମ୍ପତ୍ତିର ଅଧିକାରୀ କିଭଳି ହେଲେ ତାହାକୁ ନେଇ ଚର୍ଚ୍ଚା । ନେତାଙ୍କ ଘରପାଖର କିଛି ଯୁବକଙ୍କ କହିବା କଥା ଯେ ନିଜର କୌଳିକ ବୃତ୍ତିକୁ ବିକ୍ରିକରି ଦେଇଥିବା ଏହି ନେତା ଜଣଙ୍କ ମୁଖ୍ୟମନ୍ତ୍ରୀଙ୍କ ଏକାନ୍ତ ଅନୁଗତ କହି ଏଭଳି ସମ୍ପତ୍ତି ବଢାଇଛନ୍ତି । ଅବଶ୍ୟ ଇତି ମଧ୍ୟରେ କିଛି ସୂଚନା ଅଧିକାରକର୍ମୀ ଏହି ମନ୍ତ୍ରୀ ସମ୍ପତ୍ତି ଓ ସମ୍ପର୍କର ତାଲିକା ପ୍ରସ୍ତୁତ କରୁଥିବା ସୂଚନା ମିଳିଛି ।