ଓଡ଼ିଶା ଫାଷ୍ଟ(ବ୍ୟୁରୋ): ପୁଣି ତେଜିଲା ପସିସି ସଭାପତି ପରିବର୍ତ୍ତନ ସ୍ୱର । କିଛିଦିନ ପାଇଁ ଦବିରହିଥିବା ଧୂଆଁ ପୁଣିଥରେ କୁହୁଳିବା ଆରମ୍ଭ ହେଲାଣି । ପସିସି ସଭାପତି ନିରଞ୍ଜନ ପଟ୍ଟନାୟକଙ୍କ ପରିବର୍ତ୍ତନ ନେଇ ଆଜି ଭୁବନେଶ୍ୱର ପାନ୍ଥନିବାସ ଠାରେ କଂଗ୍ରେସ ବିଧାୟକ ଏମଡି ମୋକିମଙ୍କ ଅଧ୍ୟକ୍ଷତାରେ ଏକ ରୁଦ୍ଧଦ୍ୱାର ବୈଠକ ଅନୁଷ୍ଠିତ ହୋଇଛି । ଏହି ବୈଠକରେ କଣ ନିଷ୍ପତ୍ତି ନିଆଯାଇଛି ଏହାର ସୂଚନା ମିଳିପାରିନାହିଁ ।
ରାଜ୍ୟ କଂଗ୍ରେସରେ ପସିସି ସଭାପତି ପରିବର୍ତ୍ତନ କିଛି ନୂଆ କଥା ନୁହେଁ । ପ୍ରଥମେ ସଭାପତିଙ୍କୁ ବିରାଟ ପଟୁଆରରେ ସ୍ୱାଗତ କରିବା ଓ ତା’ ପର ମୁହୂର୍ତ୍ତରେ ତାଙ୍କୁ ଏହି ପଦରୁ ବିଦାକରିବାକୁ ଚକ୍ରାନ୍ତ କରିବେ । ଯାହାର ଫଳ ସ୍ୱରୂପ ରାଜ୍ୟ କଂଗ୍ରେସ ଆଗକୁ ଯିବା ବଦଳରେ ପଛକୁ ଘୁଞ୍ଚି ଚାଲିଛି । ଦିନକୁ ଦିନ ଏହାର ସ୍ଥିତି ଘଟିବାରେ ଲାଗିଛି ଓ ରାଜ୍ୟ କଂଗ୍ରେସ ନିଜ ଅସ୍ଥିତ୍ଵ ହରାଇ ଚାଲିଛି । ଏପରିକି ରାଜନୈତିକ ମହଲରେ ଏପରି ଚର୍ଚ୍ଚା ଚାଲିଛିକି ଯଦି ରାହୁଲ ଗାନ୍ଧୀ ନିଜେ ଆସି ରାଜ୍ୟ ପସିସି ସଭାପତି ହୁଅନ୍ତି ତେବେ ତାଙ୍କୁ ମଧ୍ୟ ପରିବର୍ତ୍ତନ କରୁବାକୁ ବିଦ୍ରୋହୀ ଆଗଭର ହେବେ ।