ଓଡ଼ିଶା ଫାଷ୍ଟ(ବ୍ୟୁରୋ): ଉତ୍ତରାଖଣ୍ଡର ରୁଦ୍ରପ୍ରୟାଗ-ଗୌରୀକୁଣ୍ଡ ଜାତୀୟ ରାଜପଥର ବଂଶୱାରାଠାରେ ଶୁକ୍ରବାର ଭୂସ୍ଖଳନ ଘଟି ୭ ଜଣ ଶ୍ରମିକଙ୍କ ମୃତ୍ୟୁ ଘଟିଥିବା ବେଳେ ୨ଜଣ ଗୁରୁତର ହୋଇଛନ୍ତି । ଏଥିସହ ଦୁର୍ଘଟଣାସ୍ଥଳରେ ଏବେ ସୁଦ୍ଧା ବହୁ ଲୋକ ଫସି ରହିଥିବା ଆଶଙ୍କା କରାଯାଉଛି । ଘଟଣାସ୍ଥଳରେ ଉଦ୍ଧାରକାରୀ ଟିମ୍ ପହଞ୍ଚି ଥିବାବେଳେ ସନ୍ଧ୍ୟା ସୁଦ୍ଧା ଉଦ୍ଧାର କାର୍ଯ୍ୟ ଜାରି ରହିଥିବା ଜଣାପଡ଼ିଛି ।
ସୂଚନାଥାଉ କି, ବଂଶୱାରାସ୍ଥିତ ଏକ ପାହାଡ଼ର କିଛି ଅଂଶକୁ ୨୩ ଜଣ ଶ୍ରମିକ ଭାଙ୍ଗୁଥିବା ବେଳେ ମାଟି ଅତଡ଼ା ଖସିବା ଆରମ୍ଭ ହୋଇଥିଲା । ଫଳରେ ସମସ୍ତେ ମାଟି ତଳେ ଚାପି ହୋଇ ରହିଯାଇଥିଲେ । ଉଦ୍ଧାରକାରୀ ଟିମ୍ ୧୨ଜଣଙ୍କୁ ସୁରକ୍ଷିତ ଅବସ୍ଥାରେ ଉଦ୍ଧାର କରିଥିବା ବେଳେ ୨ଜଣ ଗୁରୁତର ହୋଇଛନ୍ତି । ଅନ୍ୟ ୭ଶ୍ରମିକଙ୍କ ମୃତ୍ୟୁ ଘଟିଥିବାରୁ ଆଉ ୨ ଜଣ ଶ୍ରମିକ ମାଟି ତଳେ ଚାପି ହୋଇ ରହିଥିବା ଜଣାପଡିଛି । ମୃତ ଓ ନିଖୋଜ ଶ୍ରମିକଙ୍କ ମଧ୍ୟରେ ଅଧିକାଂଶ ଉତ୍ତର ପ୍ରଦେଶ ଓ ବିହାରର । ଗୁରୁତରମାନଙ୍କୁ ସ୍ଥାନୀୟ ମେଡିକାଲରେ ଭର୍ତ୍ତି କରାଯାଇଛି ।