ବଢିଲା ମେଡିକାଲ ଛାତ୍ରଛାତ୍ରୀଙ୍କ ଷ୍ଟାଇପେଣ୍ଡ

ରାଜ୍ୟରେ ନର୍ସିଂ, ଫାର୍ମାସି ଓ ଆନୁଷଙ୍ଗିକ ଡାକ୍ତରୀ ଛାତ୍ରଛାତ୍ରୀଙ୍କ ମାସିକ ଷ୍ଟାଇପେଣ୍ଡ ବୃଦ୍ଧି କୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଅନୁମୋଦନ କରିଛନ୍ତି। ଛାତ୍ରଛାତ୍ରୀଙ୍କୁ ଉନ୍ନତ ସେବା ଯୋଗାଇବା ଏବଂ ରାଜ୍ୟରେ ସ୍ୱାସ୍ଥ୍ୟସେବା ବ୍ୟବସ୍ଥାକୁ ସୁଦୃଢ଼ କରିବା ପାଇଁ ଏହି ନିଷ୍ପତ୍ତି ନିଆଯାଇଛି ବୋଲି ସରକାରଙ୍କ ତରଫରୁ କୁହାଯାଇଛି।
ସଂଶୋଧିତ ଷ୍ଟାଇପେଣ୍ଡ ରାଶି ଅୁନୁଯାୟୀ ଡି.ଫାର୍ମା: ୫୦୦ ଟଙ୍କା (୨୫୦ ଟଙ୍କାରୁ ବୃଦ୍ଧି), ଏଏନଏମ: ୨୦୦୦ ଟଙ୍କା (୧ ହଜାର ଟଙ୍କାରୁ ବୃଦ୍ଧି), ବି.ଏସସି (ନର୍ସିଂ) ଇଣ୍ଟର୍ଣ୍ଣସିପ୍ : ୫୦୦୦ ଟଙ୍କା (୨୫୦୦ ଟଙ୍କାରୁ ବୃଦ୍ଧି), କ୍ଲିନିକାଲ ସାଇକୋଲୋଜିରେ ଏମଫିଲ: ୧୦,୦୦୦ ଟଙ୍କା (୭ ହଜାର ଟଙ୍କାରୁ ବୃଦ୍ଧି), ସାଇକାଟ୍ରିକ କାର୍ଯ୍ୟରେ ଏମ୍ ଫିଲ୍: ୧୦,୦୦୦ ଟଙ୍କା (୭ ହଜାର ଟଙ୍କାରୁ ବୃଦ୍ଧି)।
ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ସରକାରୀ ଅନୁଷ୍ଠାନରେ ବିଭିନ୍ନ ପାଠ୍ୟକ୍ରମକୁ ପରିଚାଳିତ କରେ। ଯେଉଁଥିରେ ନର୍ସିଂରେ ବି.ଏସସି, ଏଏନଏମ, ଡିପ୍ଲୋମା ଇନ୍ ଫାର୍ମାସି, କ୍ଲିନିକାଲ ସାଇକୋଲୋଜିରେ ଏମଫିଲ ଏବଂ ସାଇକାଟ୍ରିକରେ ଏମଫିଲ୍ ଅନ୍ତର୍ଭୁକ୍ତ । ଏହି ପାଠ୍ୟକ୍ରମରେ ପଢୁଥିବା ଛାତ୍ରଛାତ୍ରୀମାନେ ସେମାନଙ୍କ ଶିକ୍ଷା କାଳରେ ଷ୍ଟାଇପେଣ୍ଡ ପାଇଥାନ୍ତି, ଯେଉଁ ସମୟରେ ସେମାନେ ସ୍ୱାସ୍ଥ୍ୟ ଅନୁଷ୍ଠାନରେ କ୍ଲିନିକାଲ ସେବା ମଧ୍ୟ ପ୍ରଦାନ କରନ୍ତି।
ଏମକେସିଜି ମେଡିକାଲ କଲେଜ ପରିଦର୍ଶନ ସମୟରେ ୫ଟି ଅଧ୍ୟକ୍ଷ ଭିକେ ପାଣ୍ଡିଆନଙ୍କ ଅନୁରୋଧ କ୍ରମେ ଷ୍ଟାଇପେଣ୍ଡ ବୃଦ୍ଧି ନିଷ୍ପତ୍ତି ନିଆଯାଇଛି। ଏହି ପଦକ୍ଷେପ ଛାତ୍ରଛାତ୍ରୀଙ୍କୁ ଲୋକଙ୍କୁ ଉନ୍ନତ ସେବା ଯୋଗାଇବା ଏବଂ ଓଡ଼ିଶାରେ ସ୍ୱାସ୍ଥ୍ୟ ସେବାକୁ ସୁଦୃଢ଼ କରିବା ପାଇଁ ଉତ୍ସାହିତ କରିବ ବୋଲି ଆଶା କରାଯାଉଛି।