୧୫ ବର୍ଷ ପୂରଣ କରି ୧୬ ବର୍ଷରେ ପାଦ ଥାପିଲା କମିଶନରେଟ୍ ପୋଲିସ। ଆଜି ଜନ୍ମଦିନ ପାଳନ କରିବ କମିଶନରେଟ୍ ପୋଲିସ। ଏହି ଅବସରରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଯୋଗ ଦେବାର କାର୍ଯ୍ୟକ୍ରମ ରହିଛି। ମୁଖ୍ୟମନ୍ତ୍ରୀ ଭର୍ଚୁଆଲ ମୋଡରେ ଥାନା ଗୁଡିକର ଉଦଘାଟନ କରିବେ। ମୈତ୍ରୀ ବିହାରର ନୂତନ ଥାନା ସମେତ ରାଜ୍ୟରେ ସମୁଦାୟ ୩୧ ଟି ନୂଆ ଥାନା ଆଜି ଉଦଘାଟନ ହେବ।
କମିଶନରେଟ୍ ପୋଲିସର ୧୫ ବର୍ଷ ପୂର୍ତ୍ତି ଅବସରରେ ବସ୍ତିକୁ ଚାଲ ଅଭିଯାନକୁ ଜୋରଦାର କରିଛି। ଅନେକ ସମୟରେ ରାଜଧାନୀରେ ବସ୍ତିରୁ ଅଧିକ ଅପରାଧିକ ମାମଲା ହୋଇଥାଏ। ବସ୍ତିର ଯୁବକମାନେ ଅଧିକ ଅପରାଧିକ ମାମଲାରେ ସମ୍ପୃକ୍ତ ଥିବା ଜଣାପଡ଼ିବା ପରେ କମିଶନରେଟ୍ ପୋଲିସ ଆରମ୍ଭ କରିଥିଲା ବସ୍ତିକୁ ଚାଲ ଅଭିଯାନ। ଏହି ଅଭିଯାନରେ ବସ୍ତିର ଯୁବକମାନଙ୍କୁ ବସ୍ତିମିତ୍ରରେ ସାମିଲ କରାଯାଇଥିଲା। ବସ୍ତିରୁ ନିଶା ମୁକ୍ତ କରିବାକୁ ଯୁବକମାନଙ୍କୁ ବିଭିନ୍ନ କର୍ମନିଯୁକ୍ତିରେ ସାମିଲ କରାଯାଇଥିଲା। ବସ୍ତିରେ ରହିଥିବା ଯୁବକ, ଯୁବତୀମାନଙ୍କ କଳାକୁ ରାଜ୍ୟସ୍ତରରେ ପହଞ୍ଚାଇବା ପାଇଁ କମିଶନରେଟ୍ ପୋଲିସ ଚେଷ୍ଟା ଜାରି ରଖିଥିବା କହିଛନ୍ତି ପୋଲିସ କମିଶନର ସୌମେନ୍ଦ୍ର ପ୍ରିୟଦର୍ଶୀ।