ସ୍ୱାମୀଙ୍କ ଆଗରେ ସ୍ତ୍ରୀଙ୍କୁ ଗଣଦୁଷ୍କର୍ମ; ୬ ଅଭିଯୁକ୍ତଙ୍କୁ ଗିରଫ କରି କୋର୍ଟଚାଲାଣ କରିଛି ପୋଲିସ
ପ୍ରଥମେ ସ୍ୱାମୀଙ୍କୁ ମରଣାତ୍ମକ ଆକ୍ରମଣ କରି ଟଙ୍କା ଲୁଟିବା ପରେ ସ୍ତ୍ରୀକୁ କଲେ ଗଣଦୁଷ୍କର୍ମ । ତେବେ ଏହିସବୁ ଅଭାବନୀୟ କାଣ୍ଡ ସ୍ୱାମୀଙ୍କ ଆଗରେ କରାଯାଇଥିଲା । ତେବେ ଏଭଳି ଚାଞ୍ଚଲ୍ୟକର ଘଟଣା ଘଟିଛି ବାଲେଶ୍ୱର ଜିଲ୍ଲା ଅରଡ଼ ବଜାର ଅଞ୍ଚଳରେ । ଏହି ଘଟଣାର ୪୮ ଘଣ୍ଟା ଭିତରେ ପୋଲିସ ୬ ଜଣ ଅଭିଯୁକ୍ତକୁ ଧରିବାରେ ସଫଳ ହୋଇଛି । ତେବେ ୬ ଅଭିଯୁକ୍ତଙ୍କ ମଧ୍ୟରେ ୨ ଜଣ ନାବାଳକ ଥିବା ଜଣାପଡିଛି । ଅନ୍ୟପଟେ ପୋଲିସ ସମସ୍ତ ଅଭିଯୁକ୍ତଙ୍କୁ କୋର୍ଟ ଚାଲାଣ କରିଥିବା ଜଣାପଡିଛି।
ଖବର ଅନୁଯାଇ, ୧୮ ତାରିଖ ବିଳମ୍ବିତ ରାତିରେ ଦମ୍ପତି ଷ୍ଟେସନରୁ ଫେରୁଥିବା ବେଳେ ୬ ଜଣ ଯୁବକ ସେମାନଙ୍କୁ ଅଟକାଇ ଥିଲେ । ସେଥିମଧ୍ୟରୁ ୩ଜଣ ଯୁବକ ମହିଳାଙ୍କ ସ୍ୱାମୀଙ୍କୁ କଟୁରୀ ଓ ବନ୍ଧୁକ ଦେଖାଇ ଟଙ୍କା ମାଗିଥିଲେ । ଟଙ୍କା ନଦେବାରୁ ଜଣେ ଯୁବକ ତାଙ୍କ ହାତକୁ କଟୁରୀରେ ଆକ୍ରମଣ କରିଥିଲା ।
ଏହି ସମୟରେ ଆଉଜଣେ ଯୁବକ ତାଙ୍କ ସ୍ତ୍ରୀଙ୍କୁ ସ୍କୁଟିରେ ବଳପୂର୍ବକ ଉଠାଇ ନେଇଥିଲେ । ଏକ ନିଛାଟିଆ ସ୍ଥାନ ଅଭିଯୁକ୍ତମାନେ ମହିଳାଙ୍କ ସହ ଗଣଦୁଷ୍କର୍ମ କରିଥିଲେ । ଆଉ ତାଙ୍କ ସ୍ୱାମୀଙ୍କ ଠାରୁ ୧୦ହଜାର ଟଙ୍କା ମଧ୍ୟ ଛଡ଼ାଇ ଦେଇଥିଲେ । ଦମ୍ପତି ପରଦିନ ସହଦେହଖୁଣ୍ଟା ଥାନାରେ ଅଭିଯୋଗ କରିଥିଲେ । ଅଭିଯୋଗ ଆଧାରରେ ପୋଲିସ ୬ ଜଣଙ୍କୁ ଅଟକ କରିଛି । ତେବେ ୬ ଅଭିଯୁକ୍ତଙ୍କ ମଧ୍ୟରୁ ୪ ଜଣଙ୍କୁ ଗିରଫ କରାଯାଇଥିବା ବେଳେ ୨ଜଣ ନାବାଳକଙ୍କୁ ଅଟକ ରଖିଛି । ପୀଡ଼ିତା ଓ ତାଙ୍କ ସ୍ୱାମୀଙ୍କ ଡାକ୍ତରୀ ପରୀକ୍ଷା କରାଯାଇଛି । ଘଟଣାରେ ବ୍ୟବହୃତ ଏକ କଟୁରୀ, ଦେଶୀ ବନ୍ଧୁକ, ମୋବାଇଲ ଓ ୨୫୦୦ ଟଙ୍କା ଜବତ କରିଛି ପୋଲିସ ।