ଓଡ଼ିଶା ଫାଷ୍ଟ(ବ୍ୟୁରୋ): ଆଜି ଦ୍ୱିତୀୟ ପର୍ଯ୍ୟାୟ ଭୋଟ ଗ୍ରହଣ ଚାଲିଥିବା ବେଳେ ତୃତୀୟ ଓ ଚତୁର୍ଥ ପର୍ଯ୍ୟାୟ ନିର୍ବାଚନ ପାଇଁ ଜୋରଦାର ପ୍ରଚାର ଚଳାଇଛନ୍ତି ସବୁ ଦଳର ପ୍ରାର୍ଥୀ । ପାଟକୁରା ବିଧାନସଭା କ୍ଷେତ୍ରର ବିଜେପି ପ୍ରାର୍ଥୀ ତଥା ବରିଷ୍ଠ ନେତା ବିଜୟ ମହାପାତ୍ର ସମର୍ଥକଙ୍କ ସହ ନିର୍ବାଚନ ମଣ୍ଡଳୀ ଅନ୍ତର୍ଗତ ବିଭିନ୍ନ ଗ୍ରାମରେ ପ୍ରଚାର କରୁଛନ୍ତି । ତେବେ ତାଙ୍କୁ ପ୍ରଚାର କାର୍ଯ୍ୟରେ ସହଯୋଗ କରିବାକୁ ଆଜି ପାଟକୁରାରେ ପହଞ୍ଚିଛନ୍ତି ବିଜେପିର ପୂର୍ବତନ ବିଧାୟକ ତଥା ବରିଷ୍ଠ ନେତା ଦିଲ୍ଲୀପ ରାୟ । ବିଜେପି ଛାଡ଼ି ଚର୍ଚ୍ଚାକୁ ଆସିଥିବା ଦିଲୀପ ରାୟ ନିଜ ରାଜନୈତିକ ବନ୍ଧୁ ବିଜୟ ମହାପାତ୍ରଙ୍କୁ ସହଯୋଗ କରିବା ପାଇଁ ପାଟକୁରାରେ ପହଞ୍ଚି ତାଙ୍କୁ ଭେଟିଛନ୍ତି । ଏହି ଅବସରରେ ଦିଲୀପ କହିଛନ୍ତି ଯେ, ବିଜୟ ବାବୁ ମୋର ବ୍ୟକ୍ତିଗତ ବନ୍ଧୁ । ନିର୍ବାଚନରେ ମୁଁ ତାଙ୍କୁ ସହଯୋଗ କରବି । ଏଥିସହ ସେ କହିଛନ୍ତି, ମୁଁ ବିଜୟ ବାବୁଙ୍କୁ ଶୁଭେଚ୍ଛା ଜଣାଇବାକୁ ଆସିଥିଲି । ମୋ ଦ୍ୱାରା ଯେତିକି ସାହାଯ୍ୟ ହେବା କଥା ମୁଁ କରୁଛି ଓ କରିବି । ଯେଉଁ ଦୁଇଟି ଦାବି ନେଇ ଦିଲୀପ ବିଜେପି ଛାଡ଼ିଥିଲେ ତାହା ଏବେ ପୂରଣ ହୋଇସାରିଥିବାରୁ ପୁଣିଥରେ ସେ ଦଳକୁ ଫେରିବା ନେଇ ଚର୍ଚ୍ଚା ହେଉଛି ।
ସୂଚନାଯୋଗ୍ୟ, କେନ୍ଦ୍ରାପଡ଼ା ଜିଲ୍ଲାରେ ଆସନ୍ତା ୨୯ତାରିଖରେ ଭୋଟ ଗ୍ରହଣ ହେବ । ଏଥିପାଇଁ ସବୁ ଦଳର ପ୍ରାର୍ଥୀ ଭୋଟରମାନଙ୍କୁ ପ୍ରଭାବିତ କରିବାକୁ ଚେଷ୍ଟା କରିଥିବା ବେଳେ ଏ ପର୍ଯ୍ୟନ୍ତ ବିଜେଡି ବିଧାୟକ ପ୍ରାର୍ଥୀ ବେଦପ୍ରକାଶ ଅଗ୍ରୱାଲ ଶାରୀରିକ ଅସୁସ୍ଥତା କାରଣରୁ ପ୍ରଚାର ମଇଦାନକୁ ଓହ୍ଲାଇ ନାହାନ୍ତି ।