ଓଡ଼ିଶା ଫାଷ୍ଟ(ବ୍ୟୁରୋ): ଜାତିର ଜନକ ମହାତ୍ମା ଗାନ୍ଧୀଙ୍କ ପୂଣ୍ୟ ଜନ୍ମ ଦିବସ ଅବସରରେ ସମସ୍ତେ ଗ୍ରାମ୍ୟ ଅର୍ଥନୀତିକୁ ଆଗକୁ ନେବା ପାଇଁ ଭୋକାଲ୍ ଫର୍ ଲୋକାଲକୁ ମାଧ୍ୟମ କରିବା ପାଇଁ ସଂକଳ୍ପ କରିବାକୁ ଗାନ୍ଧୀ ଜୟନ୍ତୀର ଅବ୍ୟବହିତ ପୂର୍ବରୁ ଏକ ଭିଡିଓ ବାର୍ତା ଜରିଆରେ ଜନସାଧାରଣଙ୍କୁ ଆହ୍ୱାନ କହିଛନ୍ତି କେନ୍ଦ୍ର ଶିକ୍ଷା, ଦକ୍ଷତା ବିକାଶ ଏବଂ ଉଦ୍ୟମିତା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ଶ୍ରୀ ପ୍ରଧାନ କହିଛନ୍ତି ଯେ ସତ୍ୟନିଷ୍ଠ, ସାଧୁତା, କରୁଣା ତଥା ମାନବିକତାର ମୂର୍ତିମନ୍ତ ପ୍ରତୀକ ହେଉଛନ୍ତି ମହାତ୍ମା ଗାନ୍ଧୀ । ଆମେ ଏହି ମହାନ ଯୁଗପୁରୁଷ ତଥା ଅହିଂସାର ପୂଜାରୀ ଗାନ୍ଧିଜୀଙ୍କ ଜନ୍ମ ଜୟନ୍ତୀ ଆସନ୍ତା ୨ ତାରିଖରେ ପାଳନ କରିବା । ଆମ ପାଇଁ ଖୁସିର ମୁହୂର୍ତ ଯେ, ୨୦୨୧ ହେଉଛି ଗାନ୍ଧିଜୀଙ୍କ
ଓଡ଼ିଶା ଆଗମନର ଶତବର୍ଷ ପୂର୍ତିର ପାବନ ଅବସର । ଏହି ଅବସର, ମହାତ୍ମା ଗାନ୍ଧିଜୀଙ୍କ ଶାନ୍ତି ଓ ଅହିଂସା ଆଧାରିତ ସମାଜ ଓ ରଚନାତ୍ମକ କାର୍ଯ୍ୟକୁ ନୂତନ ଏବଂ ବ୍ୟବହାରିକ ରୂପରେଖ ଦେବା ପାଇଁ ସୁଯୋଗ ଆଣିଦେଇଛି । ପୂଣ୍ୟ ଜନ୍ମ ଦିବସ ଅବସରରେ ଆମେ ସମସ୍ତେ ଭୋକାଲ୍ ଫର୍ ଲୋକାଲକୁ ସମର୍ଥନ ଦେବା ଏବଂ ସ୍ଥାନୀୟ ଉଦ୍ୟମୀ, ବୁଣାକାର, ହସ୍ତଶିଳ୍ପ କାରିଗରଙ୍କ କଳାତ୍ମକ ଉତ୍ପାଦ କିଣିବା ଏବଂ ଅନ୍ୟ ମାନଙ୍କୁ କିଣିବାକୁ ପ୍ରୋତ୍ସାହିତ କରିବା । ଏହା ଆମର ସ୍ୱଭାବ ଏବଂ ଜୀବନ ଦର୍ଶନର ଅଂଶବିଶେଷ ହେଉ । ଏହା ହିଁ ହେବ ପ୍ରକୃତ ଜନସେବା ଏବଂ ଦେଶସେବା ।
ସେ କହିଛନ୍ତି ଯେ ଗାନ୍ଧିଜୀଙ୍କ ନେତୃତ୍ୱରେ ଭାରତବର୍ଷ ଅହିଂସା ମାଧ୍ୟମରେ ସ୍ୱାଧୀନତା ଲାଭ କରି ଏକ ନୂତନ ଯୁଗର ସୂତ୍ରପାତ କରିଥିଲା । ଭାରତ ସରକାର ସ୍ୱାଧୀନତା ସଂଗ୍ରାମର ଉଚ୍ଚ ଆଦର୍ଶ, ସ୍ୱାଧୀନତା ସଂଗ୍ରାମୀଙ୍କର ବୀରତ୍ୱପୂର୍ଣ୍ଣ ସଂଘର୍ଷ ଏବଂ ତ୍ୟାଗକୁ ସମ୍ମାନ ଜଣାଇ ‘ଅମୃତ ମହୋତ୍ସବ’କୁ ଭବ୍ୟ ଭାବରେ ପାଳନ କରୁଛନ୍ତି ଯାହା ଯୁବପିଢ଼ିକୁ ଦେଶପ୍ରୀତିରେ ଅନୁପ୍ରାଣିତ କରିବ । ସେହିପରି ଗାନ୍ଧିଜୀଙ୍କ ସ୍ୱାଧୀନତା
ସଂଗ୍ରାମ ଓ ରାଷ୍ଟ୍ର ନିର୍ମାଣ ଚିନ୍ତନରେ ‘ଖଦୀ’ର ପ୍ରମୁଖ ଭୂମିକା ରହିଥିଲା । ୨୦୨୧ରେ ଖଦୀର ବ୍ୟାପକ
ବ୍ୟବହାର ଦେଶର ପ୍ରଗତିରେ ପ୍ରମୁଖ ଅଂଶୀଦାର ଭାବେ ଗୁରୁତ୍ୱପୂର୍ଣ୍ଣ ଯୋଗଦାନ କରିପାରିବ ।
ଯଶସ୍ୱୀ ପ୍ରଧାନମନ୍ତ୍ରୀ ମୋଦିଜୀଙ୍କର ଭୋକାଲ୍ ଫର୍ ଲୋକାଲ ନୀତି ଗୀନ୍ଧିଜୀଙ୍କ ଅର୍ଥନୈତିକ ଚିନ୍ତନର
ବ୍ୟବହାରିକ ପ୍ରୟୋଗ । ଆମ ରାଜ୍ୟ ଓଡ଼ିଶାର ପ୍ରତ୍ୟେକଟି ଗାଁରେ କିଛି ନା କିଛି କଳାତ୍ମକ ହସ୍ତଶିଳ୍ପ
ରହିଛି ଯାହା ଓଡ଼ିଆ ଜାତିକୁ ଅନନ୍ୟ ପରିଚୟ ଦେଇଛି । ଭୋକାଲ୍ ଫର୍ ଲୋକାଲ ଆମ ଗ୍ରାମାଂଚଳର ଆର୍ôଥକ ଅବସ୍ଥା ଏବଂ ଆତ୍ମନିର୍ଭରତାକୁ ସୁଦୃଢ଼ କରିବାର ଅନନ୍ୟ ପଦକ୍ଷେପ । ଓଡିଶାରେ ପ୍ରତ୍ୟେକ ଗାଁରେ କିଛି ନା କିଛି ନୂଆ ଜିନିଷ ତିଆରି ହେଉଛି । ପଟ୍ଟଚିତ୍ର, ହସ୍ତତନ୍ତ, ହସ୍ତଶିଳ୍ପ କିମ୍ବା ଅନ୍ୟାନ୍ୟ ଖାଦ୍ୟପଦାର୍ଥକୁ ସମସ୍ତେ ଜୀବନର ନିଜ ବ୍ୟବହାର୍ଯ୍ୟ ପାଇଁ କିଣିବା ଦରକାର । କରୋନା ମହାମାରୀ କାଳରେ ଅର୍ଥନୀତିକୁ ଗତି ଦେବା ପାଇଁ ଚଳିତ ପାର୍ବଣ ଋତୁରେ ଏହି ସବୁ ଉତ୍ପାଦ କିଣି ଗ୍ରାମ୍ୟ ଅର୍ଥନୀତିକୁ ମଜବୁତ୍ କରିବା ପାଇଁ ଯୋଗଦାନ ରଖିବା ଦରକାର । ଆସନ୍ତା ଗାନ୍ଧୀ ଜୟନ୍ତୀ ଅବସରରେ ଅନୁଗୁଳ ଆଠମଲ୍ଲିକ ସବଡିଭିଜନକୁ ଯାଇ ଗାଁର ଲୋକମାନଙ୍କ ଦ୍ୱାରା ହସ୍ତଶିଳ୍ପକୁ କିଣିବେ ବୋଲି ସେ କହିଛନ୍ତି । ଦେଶକୁ ନୂଆ ଉଚ୍ଚତାକୁ ନେବା ତଥା ପୂଜ୍ୟ ବାପୁଙ୍କୁ ସଠିକ୍ ଶ୍ରଦ୍ଧାଞ୍ଜଳି ଦେବା ପାଇଁ ମହତ୍ୱ ଦେବା ପାଇଁ ଆଜିର ଦିନରେ ସଂକଳ୍ପ ହେଉ ବୋଲି କେନ୍ଦ୍ରମନ୍ତ୍ରୀ ଶ୍ରୀ ପ୍ରଧାନ କହିଛନ୍ତି ।
