ଓଡ଼ିଶା ଫାଷ୍ଟ(ବ୍ୟୁରୋ): ଗୁଜୁରାଟରେ ଜୀବିକା ହରାଇ ଫେରୁଥିଲେ ଘରକୁ । ମାତ୍ର ଘରେ ପହଞ୍ଚିବା ପୂର୍ବରୁ ଗାଡି ହେଲା ଦୁର୍ଘଟଣା ଗ୍ରସ୍ତ । ଗତକାଲି ସଂଧ୍ୟାରେ ଗୁଜୁରାଟ ଫେରନ୍ତା ଗୋଟିଏ ବସ କଳିଙ୍ଗା ଘାଟିରେ ଓଲଟିବାର ୨୪ଘଣ୍ଟା ନପୂରୁଣୁ ନାଗପୁର-ଅମରାବତୀ ଜାତୀୟ ରାଜପଥ ନିକଟରେ ବସ ନଂ GJ0-6ZZ9559 ଓଲଟି ପଡ଼ିଛି । ଏହି ଦୁର୍ଘଟଣାରେ ୫ଜଣ ଗୁରୁତର ଆହତ ହୋଇଛନ୍ତି । ଆହତଙ୍କୁ ଅମରାବତୀ ହସ୍ପିଟାଲରେ ଭର୍ତ୍ତି କରାଯାଇଛି । ଦୁର୍ଘଟଣାସ୍ଥଳରେ ପୁଲିସ ପହଞ୍ଚି ବସରୁ ଯାତ୍ରୀମାନଙ୍କୁ ଉଦ୍ଧାର କରିଥିଲା ।
ସୂଚନା ଅନୁଯାୟୀ, ଶୁକ୍ରବାର ରାତିରେ ସୁରତରୁ ୫୦ ଜଣ ଯାତ୍ରୀଙ୍କୁ ଧରି ଗଞ୍ଜାମ ବାହାରିଥିବା ବସ ନଂ GJ0-6ZZ9559 ଆଜି ସକାଳ ୭ଟାରୁ ୮ଟା ମଧ୍ୟରେ ନାଗପୁର-ଅମରାବତୀ ଜାତୀୟ ରାଜପଥ ନିକଟରେ ଭାରସାମ୍ୟ ହରାଇ ରାସ୍ତାରେ ଓଲଟି ପଡିଥିଲା ।
ସେହିପରି ଗତକାଲି ସଂଧ୍ୟାରେ ଗୁଜୁରାଟ ଫେରନ୍ତା ଗୋଟିଏ ବସ କଳିଙ୍ଗା ଘାଟିରେ ଓଲଟିଯିବା ଫଳରେ ବୁଗୁଡ଼ାର ସନ୍ତୋଷ କୁମାର ସେଠୀ(୩୮) ଓ ଚିତ୍ତରଞ୍ଜନ ସେଠୀଙ୍କର ମୃତ୍ୟୁ ହୋଇଥିଲା । ଏବଂ ୪୦ ଜଣ ଆହତ ହୋଇଥିଲେ ।