ଓଡ଼ିଶା ଫାଷ୍ଟ(ବ୍ୟୁରୋ): ରାଜ୍ୟରେ ବଢୁଥିବା ବେରୋଜଗାରୀ କୁ ମୁଖ୍ୟ ପ୍ରସଙ୍ଗ କରି ଆଜି ଭାରତୀୟ ଜନତା ଯୁବ ମୋର୍ଚ୍ଚା ବିଧାନସଭା ଘେରାଉ କରିବାକୁ ଉଦ୍ୟମ କରିବା ସମୟରେ ପୋଲିସ ସହ ଧସ୍ତାଧସ୍ତି ପରିସ୍ଥିତି ସୃଷ୍ଟି ହୋଇଛି । ଶତାଧିକ କର୍ମୀ ଗିରଫ ।
ସୂଚନା ଅନୁଯାୟୀ, ବିଗତ ୧୯ ବର୍ଷ ନିରବଚ୍ଛିନ୍ନ ଶାସନକାଳ ମଧ୍ୟରେ ରାଜ୍ୟ ସରକାର ନିଯୁକ୍ତିର କୌଣସି ସୁଯୋଗ ସୃଷ୍ଟି କରିପାରିନାହାନ୍ତି । ତେଣୁ ଆଜି ରାଜ୍ୟର ବେକାରୀ ସଂଖ୍ୟା ଅହେତୁକ ଭାବେ ବଢ଼ିବାରେ ଲାଗିଛି । ଯାହାକି ରାଜ୍ୟ ପାଇଁ ଏକ ଚିନ୍ତାର ବିଷୟ । ବର୍ତ୍ତମାନ ରାଜ୍ୟ ସରକାରଙ୍କୁ ଏହାର ଜବାବ ମାଗିବାର ଉଚିତ ସମୟ । ତେଣୁ ଆଜି ରାଜ୍ୟ ଭାରତୀୟ ଜନତା ଯୁବ ମୋର୍ଚ୍ଚାର ସଭାପତି ଟଙ୍କଧର ତ୍ରିପାଠୀଙ୍କ ନେତୃତ୍ୱରେ ରାଜ୍ୟରେ ବଢୁଥିବା ବେରୋଜଗାରୀ କୁ ପ୍ରସଙ୍ଗ କରି ହଜାର ହଜାର କର୍ମୀ ଭୁବନେଶ୍ୱର ଲୋୟର ପିଏମଜିରୁ ବିଧାନସଭା ଘେରିବାକୁ ବାହାରି ଥିଲେ । ଏହି ସମୟରେ ପୋଲିସ ସହ ସେମାନଙ୍କର ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଥିଲା । ପୋଲିସ ଶତାଧିକ ରାଜ୍ୟ ବିଜେପି ଯୁବ ମୋର୍ଚ୍ଚା କର୍ମୀଙ୍କୁ ଗିରଫ କରିଥିବା ସୂଚନା ମିଳିଛି ।
