କୋଲକାତା ୩୦।୦୮: ପଶ୍ଚିମବଙ୍ଗରେ ମମତା ବାନାର୍ଜୀଙ୍କ ନେତୃତ୍ଵାଧୀନ ଟିଏମସ ସୋମବାର ବିଜେପିକୁ ଆଉ ଏକ ଝଟକା ଦେଇଛି। ଅନେକ ନେତାଙ୍କୁ ପୂର୍ବରୁ ସାମିଲ୍ କରାଇ ସାରିଥିବା ଟିଏମସି ଏବେ ବିଷ୍ଣୁପୁରରୁ ବିଧାୟକ ତନ୍ମୟ ଘୋଷଙ୍କୁ ଦଳକୁ ଫେରାଇ ଆଣିବାରେ ସଫଳ ହୋଇଛି। ତନ୍ମୟ ଘୋଷ ସୋମବାର ବିଜେପି ଛାଡି ଟିଏମସିରେ ସାମିଲ ହୋଇଛନ୍ତି। ଟିଏମସିରେ ଯୋଗ ଦେବା ପରେ ସେ ଅଭିଯୋଗ କରିଛନ୍ତି ଯେ, ବିଜେପି ପ୍ରତିଶୋଧ ରାଜନୀତିରେ ଲିପ୍ତ ରହିଛି।
ଘୋଷ ଦାବି କରିଛନ୍ତି ଯେ, ବିଜେପି ପଶ୍ଚିମବଙ୍ଗର ଲୋକଙ୍କ ମଧ୍ୟରେ ଅରାଜକତାର ମାହୋଲ ସୃଷ୍ଟି କରିବାକୁ ଉଦ୍ୟମ ଚଳାଇଛି। ଏହି କାରଣରୁ ସେ ଟିଏମସିରେ ସାମିଲ୍ ହୋଇଛନ୍ତି। ମୁଁ ସମସ୍ତଙ୍କୁ ପଶ୍ଚିମବଙ୍ଗର କଲ୍ୟାଣ ପାଇଁ ଟିଏମସିରେ ଯୋଗ ଦେବାକୁ ନିବେଦନ କରୁଛି। ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ହାତ ମଜବୁତ କରିବାର ଆବଶ୍ୟକତା ରହିଛି।
ଘୋଷ ପଶ୍ଚିମବଙ୍ଗ ବିଧାନସଭା ନିର୍ବାଚନର କିଛି ଦିନ ପୂର୍ବରୁ ମାର୍ଚ୍ଚରେ ଟିଏମସି ଛାଡି ବିଜେପିରେ ଯୋଗ ଦେଇଥିଲେ। ଏହା ପୂର୍ବରୁ ସେ ଟିଏମସିର ଯୁବ ମୋର୍ଚ୍ଚାର ବାଙ୍କୁଡା ଜିଲ୍ଲାର ବିଷ୍ଣୁପୁର ସହର ଅଧ୍ୟକ୍ଷ ଥିଲେ। ରାଜ୍ୟ ଶିକ୍ଷା ମନ୍ତ୍ରୀ ବ୍ରାତ୍ୟ ବସୁ କହିଛନ୍ତି ଯେ, ବିଜେପି ନିର୍ବାଚନରେ ହାରିବା ପରେ ପ୍ରତିଶୋଧ ନେବାକୁ ଚେଷ୍ଟା କରୁଛି। ସେ କହିଛନ୍ତି ଯେ, ବିଜେପିର ଅନେକ ନେତା ଟିଏମସି ସଂପର୍କରେ ଅଛନ୍ତି।