ଓଡ଼ିଶା ଫାଷ୍ଟ(ବ୍ୟୁରୋ): ଅନଗୁଳ ଜିଲ୍ଲାପାଳଙ୍କ ଆକାଉଣ୍ଟରୁ ଗାୟବ ହୋଇଥିବା ଟଙ୍କା ପୁନର୍ବାର ଆକାଉଣ୍ଟକୁ ଫେରିଥିବା ସୂଚନା ଦେଇଛନ୍ତି ଜିଲ୍ଲାପାଳ ମନୋଜ ମହାନ୍ତି । ତତ୍କାଳୀନ ବ୍ୟାଙ୍କ ମ୍ୟାନେଜର ଶକ୍ତି ବେଦାନ୍ତ ଦାସ ଜିଲ୍ଲାପାଳଙ୍କ ଆକାଉଣ୍ଟରୁ ଲୁଟି ନେଇଥିଲେ ୬୦ ଲକ୍ଷ ଟଙ୍କା ।
ଘଟଣାକ୍ରମେ, ଗତ ୨୦୧୭ ଓ ୨୦୧୮ ମସିହାରେ ତତ୍କାଳୀନ ଅନୁଗୁଳ ଏଚ.ଡି.ଏଫ.ସି ବ୍ୟାଙ୍କ ମ୍ୟାନେଜର ଶକ୍ତି ବେଦାନ୍ତ ଦାସ ଅନୁଗୁଳ ଜିଲ୍ଲାପାଳ ମନୋଜ ମହାନ୍ତିଙ୍କ ୮ଟି ଜାଲ ଦସ୍ତଖତ କରି ଜିଲ୍ଲାପାଳଙ୍କ ଆକାଉଣ୍ଟରୁ ଲୁଟି ନେଇଥିଲେ ୬୦ ଲକ୍ଷ ଟଙ୍କା । ଏହାପରେ ଶକ୍ତି ବେଦାନ୍ତ ସେହି ବ୍ୟାଙ୍କରୁ ଚାକିରୀ ଛାଡି ଦେଇଥିଲେ । ଏହା ପରେ ଶକ୍ତି ଆଇଡ଼ିଏଫସି ବ୍ୟାଙ୍କ ଭୁବନେଶ୍ୱର ବ୍ରାଞ୍ଚରେ କାମ କରୁଥିଲେ ।
ଅନଗୁଳ ଏଚ.ଡି.ଏଫ.ସି ବ୍ୟାଙ୍କ ଠକେଇ ଅଭିଯୋଗରେ ବର୍ତ୍ତମାନ ଆଇଡ଼ିଏଫସି ବ୍ୟାଙ୍କ ଭୁବନେଶ୍ୱର ଶାଖାରେ କାମ କରୁଥିବା ଶକ୍ତି ବେଦାନ୍ତ ଦାସଙ୍କୁ ଅନୁଗୁଳ ପୋଲିସ ଗିରଫ କରିଛି । ଗିରଫ ବ୍ୟାଙ୍କ ମ୍ୟାନେଜରଙ୍କ ଘର ଭୁବନେଶ୍ୱରର ନାଗେଶ୍ୱର ଟାଙ୍ଗି ଅଞ୍ଚଳରେ । ଏଚ.ଡି.ଏଫ.ସି ବ୍ୟାଙ୍କରେ ଅନୁଗୁଳୁ ଜିଲ୍ଲାପାଳଙ୍କ ଏକ ଆକାଉଣ୍ଟ ରହିଛି । ଜାତୀୟ ରାଜପଥ ଓ ରାଜ୍ୟ ରାଜପଥ ସମ୍ପ୍ରସାରଣ ପାଇଁ ଜମିଅଧିଗ୍ରହଣ ବାବଦରେ ସରକାର ଜିଲ୍ଲାପାଳଙ୍କ ଆକାଉଣ୍ଟରେ ୨୦୧୩ ମସିହାରେ ୬୦ ଲକ୍ଷ ଟଙ୍କା ଜମା କରିଥିଲେ । ଅଭିଯୋଗ ଆସିବା ପରେ ଅନଗୁଳ ପୋଲିସ ଶକ୍ତି ବେଦାନ୍ତଙ୍କୁ ଗିରଫ କରିଛି । ଏହି ଘଟଣା ସମ୍ନାକୁ ଆସିବା ପରେ ଏଚ.ଡି.ଏଫ.ସି ବ୍ୟାଙ୍କ ୬୦ଲକ୍ଷ ଟଙ୍କା ଅନଗୁଳ ଜିଲ୍ଲାପାଳଙ୍କ ଆକାଉଣ୍ଟକୁ ଫେରସ୍ତ କରିଥିବା ଜିଲ୍ଲାପାଳ ମନୋଜ ମହାନ୍ତି କହିଛନ୍ତି ।
