ବ୍ୟସ୍ତ ଜୀବନଶୈଳୀ ବର୍ତ୍ତମାନ ସମୟରେ ଅନେକଙ୍କ ମଧ୍ୟରେ ମାନସିକ ଚାପ ଭରିଦେଇଛି । ଚାପ ଆଜି ସମସ୍ତଙ୍କ ଜୀବନର ଏକ ଅଂଶ ପାଲଟିଯାଇଛି । ନିଜକୁ ଆର୍ଥିକ ଦୃଷ୍ଟିରୁ ସ୍ଥିର କରିବା, ଏକ ଭଲ ଚାକିରି ଖୋଜିବା, କିମ୍ବା ପିଲା ଏବଂ ପରିବାରର ଭବିଷ୍ୟତକୁ ସୁରକ୍ଷିତ ରଖିବାର ଦାୟିତ୍ବ ଚାପର ମୁଖ୍ୟ କାରଣ ହୋଇପାରେ ।
ଏହାକୁ ଆହୁରି ଦ୍ବିଗୁଣିତ କରିଦିଏ କାର୍ଯ୍ୟାଳୟର ଚାପ । କାର୍ଯ୍ୟାଳୟରେ ସାଧାରଣ ସମସ୍ୟା ଜଣେ ବ୍ୟକ୍ତିଙ୍କୁ ସବୁଠୁ ଅଧିକ ପ୍ରଭାବିତ କରିପାରେ ।
ଏହି କାରଣରୁ ଉଦାସୀନତାର ଶିକାର ହେବା ସ୍ବାଭାବିକ । ତେବେ ଆପଣ ଯଦି ଏହି ସମସ୍ୟାର ସମ୍ମୁଖୀନ ହେଉଛନ୍ତି, ଆମେ ନେଇ ଆସିଛୁ ତା’ର ସମାଧାନ । ଚାପରୁ ରକ୍ଷା ପାଇବା ପାଇଁ କେଉଁସବୁ ଉପାୟ ଅବଲମ୍ବନ କରିବେ, ଜାଣନ୍ତୁ…
ସୂର୍ଯ୍ୟକିରଣରେ ବସନ୍ତୁ: ଅନେକ ଅଧ୍ୟୟନରୁ ଜଣାପଡିଛି ଯେ, ସୂର୍ଯ୍ୟ କିରଣ ମନକୁ ହାଲୁକା କରିଥାଏ, ଚାପକୁ ହ୍ରାସ କରିଥାଏ ଏବଂ ଉଦାସୀନତା ଭଳି ଗୁରୁତର ରୋଗର ଆଶଙ୍କାକୁ ମଧ୍ୟ କମାଏ । ସେଥିପାଇଁ ୨୦ ରୁ ୩୦ ମିନିଟ୍ ପର୍ଯ୍ୟନ୍ତ ସୂର୍ଯ୍ୟକିରଣରେ ଚାଲିବାକୁ କିମ୍ବା କିଛି ସମୟ ସୂର୍ଯ୍ୟକିରଣରେ ବସିବାକୁ ଚେଷ୍ଟା କରନ୍ତୁ । ଏହି କାରଣରୁ, ଭିଟାମିନ୍-D ର ଅଭାବ ମଧ୍ୟ ଦୂର ହେବ ଏବଂ ଚାପରୁ ମଧ୍ୟ ମୁକ୍ତି ମିଳିବ । ସୂର୍ଯ୍ୟକିରଣ ଆମ ଶରୀରରେ ମେଲାଟୋନିନ୍ ହରମୋନ୍ ଉତ୍ପାଦନ କରିଥାଏ । ଏହା ଭଲ ନିଦକୁ ମଧ୍ୟ ପ୍ରୋତ୍ସାହିତ କରିବାରେ ସାହାଯ୍ୟ କରେ ।
ସଙ୍ଗୀତ ଶୁଣନ୍ତୁ: ଯଦି ଅତ୍ୟଧିକ ଚାପ ଏବଂ ଥକି ଯାଉଛନ୍ତି, ତେବେ ପସନ୍ଦର ଗୀତ ଶୁଣନ୍ତୁ, ଏହା ତୁରନ୍ତ ମନୋବଳକୁ ଉନ୍ନତ କରିପାରିବ । ସଙ୍ଗୀତ ମୁଡ୍ ବୁଷ୍ଟର୍ ଭାବରେ କାର୍ଯ୍ୟ କରିପାରେ । ଯଦି ମାନସିକ ସ୍ତରରେ ଭଲ ଅନୁଭବ କରିବେ ତେବେ ଏହା ନିଶ୍ଚୟ ଉଭୟ ଚାପ ଏବଂ ଥକ୍କାକୁ ଦୂର କରିଦିଏ । ହେଲେ ମନେରଖନ୍ତୁ, ସର୍ବଦା କମ୍ ଭଲ୍ୟୁମ୍ରେ ସଙ୍ଗୀତ ଶୁଣିବା ଉଚିତ୍, ନଚେତ୍ ଉଚ୍ଚ ସ୍ୱର କାନ ପାଇଁ କ୍ଷତିକାରକ ହୋଇପାରେ ।
ଧ୍ୟାନ କରନ୍ତୁ: ମାନସିକ ଶାନ୍ତି ପାଇଁ ଧ୍ୟାନ ଏକ ଭଲ ଏବଂ ପ୍ରଭାବଶାଳୀ ଉପାୟ ଏହା ମନରେ ଚାଲୁଥିବା ବିଭିନ୍ନ ଭାବନାକୁ ଶାନ୍ତ କରିଥାଏ । ଧ୍ୟାନ କେବଳ ଚାପରୁ ମୁକ୍ତି ଦେଇନଥାଏ, ବରଂ ଏହା ଉଭୟ ମାନସିକ ଏବଂ ଶାରୀରିକ ସ୍ତରରେ ସୁସ୍ଥ ରହିବାକୁ ସାହାଯ୍ୟ କରିଥାଏ ।
ଲୋକଙ୍କ ସହ କଥାବାର୍ତ୍ତା କରନ୍ତୁ: ଯଦି ଅସୁବିଧା ଏବଂ ଦ୍ୱନ୍ଦ୍ୱ ଅନୁଭବ କରୁଛନ୍ତି, ତେବେ ସୋସିଆଲ ମିଡିଆ ଛାଡି ଆଖପାଖରେ ଥିବା ଲୋକଙ୍କ ସହ କଥା ହୁଅନ୍ତୁ । ସାଙ୍ଗମାନଙ୍କ ସହିତ ବସନ୍ତୁ । ସହକର୍ମୀମାନଙ୍କ ସହିତ ଚା’ ବ୍ରେକ୍ ପାଇଁ ଯାଆନ୍ତୁ, ପରିବାର ସହିତ ସମୟ ବିତାନ୍ତୁ । ପ୍ରିୟଜନଙ୍କ ସହିତ ରାତ୍ରୀ ଭୋଜନ କରନ୍ତୁ, ସେମାନଙ୍କ ସହ କଥା ହୁଅନ୍ତୁ, ଏହା ମନୋବଳକୁ ସୁଦୃଢ କରିବ ।
ବ୍ୟାୟାମ: ଅନେକ ଲୋକେ ଗୋଟିଏ ସ୍ଥାନରେ ବସି କାମ କରନ୍ତି, ସେତେବେଳେ ଉଦାସୀନତା ଏବଂ ଅସ୍ଥିରତା ଲାଗେ । ନିଜକୁ ଶାରୀରିକ ଭାବରେ ସକ୍ରିୟ କରିବାକୁ ଚେଷ୍ଟା କରନ୍ତୁ ଏବଂ ପ୍ରତିଦିନ କିଛି ସମୟ ପାଇଁ କଠିନ ପରିଶ୍ରମ କରନ୍ତୁ । ଯଦି ଜିମ୍ ଯିବାକୁ ପସନ୍ଦ କରନ୍ତି ନାହିଁ, ତେବେ ଘରେ କିଛି ବ୍ୟାୟାମ କରନ୍ତୁ ।