ଓଡ଼ିଶା ଫାଷ୍ଟ(ବ୍ୟୁରୋ): ସିବିଆଇ କନ୍ଦଳ ସୁପ୍ରିମକୋର୍ଟ ରେ ବିଚାର ଚାଲିଥିବା ବେଳେ ସିବିଆଇ ର ପକ୍ଷ ଛେଦନ କରିବାକୁ ଯାଇ ଆନ୍ଧ୍ରପ୍ରଦେଶ ସରକାର ତାଙ୍କ ବିନା ଅନୁମତିରେ ରାଜ୍ୟରେ କୌଣସି ମାମଲାରେ ସିବିଆଇ ତଦନ୍ତ କରିପାରିବେ ନାହିଁ ବୋଲି ନିର୍ଦ୍ଦେଶ ନାମା ଜାରି କରିଛନ୍ତି ।
ସୂଚନା ଅନୁଯାୟୀ, ଦିଲ୍ଲୀ ସ୍ପେଶାଲ ପୋଲିସ ଏଷ୍ଟାବ୍ଲିସମେଣ୍ଟ ଆକ୍ଟ କୁ ଦିଆଯାଇଥିବା ସ୍ୱୀକୃତି କୁ ଆନ୍ଧ୍ର ପ୍ରଦେଶରେ ସରକାର ପ୍ରତ୍ୟାହାର କରିନେଇଛନ୍ତି।ଏସମ୍ପର୍କରେ ନାଇଡୁ ସରକାରଙ୍କ ତରଫରୁ ବିଧିବଦ୍ଧ ବିଜ୍ଞପ୍ତି ପ୍ରକାଶ କରିଛନ୍ତି।ସେହିଭଳି ତାଙ୍କ ଦେଖା ଦେଖି ପଶ୍ଚିମବଙ୍ଗ ର ମମତା ବାନାର୍ଜୀ ଙ୍କ ସରକାର ମଧ୍ୟ ଅନୁରୂପ ଭାବରେ ଦିଲ୍ଲୀ ସ୍ପେଶାଲ ପୋଲିସ ଏଷ୍ଟାବ୍ଲିସମେଣ୍ଟ ଆକ୍ଟ କୁ ଦିଆଯାଇଥିବା ସ୍ୱୀକୃତି କୁ ମଧ୍ୟ ପ୍ରତ୍ୟାହାର କରିଛନ୍ତି । ଏହି ଆଇନ ବଳରେ ସିବିଆଇ ଅନ୍ୟ ରାଜ୍ୟରେ ମାମଲା ତଦନ୍ତ କରିଥାଏ । ଏହି ଅନୁମତି ନଥିଲେ କୋଣସି ମାମଲାର ରେ କେନ୍ଦ୍ରୀୟ ତଦନ୍ତକାରୀ ଦଳ ତଦନ୍ତ କରିପାରିବେ ନାହିଁ । ଗତ ଛଅ ମାସରେ ସିବିଆଇ ର କାର୍ଯ୍ୟଦକ୍ଷତା ଓ କେନ୍ଦ୍ର ସରକାରଙ୍କ ଆଭିମୁଖ୍ୟ କୁ ନେଇ ରାଜ୍ୟ ସରକାର ଏଭଳି ନିଷ୍ପତ୍ତି ନେଇଛନ୍ତି ବୋଲି ଟିଡିପି ନେତା ଲଙ୍କା ଦିନାକର ସୂଚନା ଦେଇ ଥିଲା ବେଳେ ଏହା ବିଜେପି ସରକାର ଓ ଚନ୍ଦ୍ରାବାବୁ ନାଇଡୁ ଙ୍କ ମଧ୍ୟରେ କିଛି ଦିନ ହେଲା ଲାଗିରହିଥିବା କନ୍ଦଳର ଏହା ପ୍ରତିଫଳନ ବୋଲି ଚାରିଆଡ଼େ ଚର୍ଚ୍ଚା ଚାଲିଛି । ଏଠାରେ ସୂଚନାଯୋଗ୍ୟ ଯେ ଚଳିତ ଜାନୁଆରୀ ରେ ସିବିଆଇ ସୁପ୍ରିମକୋର୍ଟ ରେ ଏକ ପିଟିସନ ଦାଖଲ କରି ତଦନ୍ତ ବେଳେ ରାଜ୍ୟ ସରକାରଙ୍କ ଆବଶ୍ୟକତା ଅଛି କି ନାହିଁ,ସ୍ପଷ୍ଟୀକରଣ ଲୋଡ଼ିଥିବା ବେଳେ ଏସମ୍ପର୍କରେ ସୁପ୍ରିମକୋର୍ଟ ରୁ କିଛି ନିର୍ଦ୍ଦେଶ ଆସିପାରିନାହିଁ ।