ରାକ୍ଷୀ ସାୱନ୍ତ ଓ ତାଙ୍କ ସ୍ବାମୀ ଆଦିଲ ଖାନ ଦୁରାନୀ ଏବେ ନିଜ ବ୍ୟକ୍ତିଗତ ଜୀବନକୁ ନେଇ ଚର୍ଚ୍ଚାରେ। ବିବାହ ପରଠାରୁ ହିଁ ଉଭୟଙ୍କ ମଧ୍ୟରେ ତିକ୍ତତା ଦେଖା ଦେଇଛି। ନିକଟରେ ରାକ୍ଷୀ ଆଦିଲଙ୍କ ବିରୋଧରେ ଠକେଇ ଓ ଘରୋଇ ହିଂସା ଅଭିଯୋଗ ଆଣିବା ପରେ ଆଦିଲଙ୍କୁ ୧୪ ଦିନିଆ ବିଚାର ବିଭାଗୀୟ ହାଜତକୁ ପଠାଯାଇଛି।
ଇତି ମଧ୍ୟରେ ଆଦିଲଙ୍କ ନାଁରେ ପୁଣି ଏକ ଏତଲା ରୁଜୁ ହୋଇଛି। ଆଦିଲଙ୍କ ବିରୋଧରେ ଜଣେ ଇରାନୀୟ ଛାତ୍ରୀ ଦୁଷ୍କର୍ମ ଅଭିଯୋଗ ଆଣିଛନ୍ତି। ଏନେଇ ମହୀଶୂରର ଭିଭି ପୁରମ ଥାନାରେ ଆଇପିସି ଧାରା ୩୭୬ ଅନୁଯାୟୀ ଆଦିଲ ଦୁରାନୀଙ୍କ ବିରୋଧରେ ଏତଲା ରୁଜୁ କରାଯାଇଛି।
ଇରାନୀୟ ଯୁବତୀ ଦେଇଥିବା ‘ଏଫ୍ଆଇଆର୍’ରେ ଉଲ୍ଲେଖ ଅଛି ଯେ, ସେମାନେ ମହୀଶୂରରେ ଏକତ୍ର ବାସ କରୁଥିବା ବେଳେ ବିବାହ ପ୍ରତିଶ୍ରୁତି ଦେଇ ଆଦିଲ୍ ତାଙ୍କ ସହ ଦୁଷ୍କର୍ମ କରିଥିଲେ। ୫ ମାସ ତଳେ ଯୁବତୀ ଜଣକ ତାଙ୍କୁ ବିବାହ କରିବାକୁ କହିବାରୁ ସେ ମନା କରିଦେଇଥିଲେ ଓ କହିଥିଲେ ଯେ, ଅନେକ ଝିଅଙ୍କ ସହିତ ସେ ଏଭଳି ସମ୍ପର୍କରେ ଅଛନ୍ତି। ଏହାପରେ ସେ ଇରାନୀୟ ଯୁବତୀଙ୍କର କେତେକ ଅଶ୍ଳୀଳ ଫଟୋ ପଠାଇ ଧମକ ଦେଇ କୌଣସି ପ୍ରକାର ଅଭିଯୋଗ ଦାଏର ନକରିବାକୁ କହିଥିଲେ। ଅଭିଯୋଗକୁ ଭିତ୍ତି କରି ଆଦିଲ୍ଙ୍କ ନାଁରେ ମାମାଲା ରୁଜୁ କରାଯାଇଛି।