ଓଡିଶା ଫାଷ୍ଟ( ବ୍ୟୁରୋ):ଦିଲ୍ଲୀରେ ନିର୍ବାଚନ ଫଳାଫଳ ପ୍ରକାଶପରେ ହିଂସା ଦେଖିବାକୁ ମିଳିଛି। ମହରୌଲିର ଆମ୍ ଆଦ୍ବୀ ପାର୍ଟି(ଆପ୍) ବିଧାୟକ ନରେଶ ଯାଦବଙ୍କୁ ମରଣାନ୍ତକ ଆକ୍ରମଣ କରାଯାଇଛି। ଏହା ସହିତ ତାଙ୍କ ସାଥୀରେ ଥିବା ଜଣେ କର୍ମୀଙ୍କୁ ହତ୍ୟା କରାଯାଇଛି। ଅରୁଣା ଆସଫ ଅଲି ରୋଡ୍ରେ ଏହି ଘଟଣା ଘଟିଛି। ପୁଲିସ ଘଟଣାରେ ସମ୍ପୃକ୍ତ ଜଣେ ଅଭିଯୁକ୍ତଙ୍କୁ ଗିରଫ କରିଛି। ନିର୍ବାଚନ ଫଳାଫଳ ପ୍ରକାଶ ପାଇବା ପରେ ନରେଶ ମନ୍ଦିର ଯାଇ ଠାକୁରଙ୍କ ଦର୍ଶନ ସାରି ଫେରୁଥିଲେ। ଏହି ସମୟରେ ଦୁର୍ବୃତ୍ତମାନେ ତାଙ୍କ ଗାଡ଼ି ଉପରକୁ ଆଖିବୁଜା ଗୁଳିମାଡ଼ କରିଥିଲେ। ନରେଶ ଅଳ୍ପକେ ବର୍ତ୍ତିଯାଇଥିବାବେଳେ ଘଟଣାସ୍ଥଳରେ ନରେଶଙ୍କ ସହିତ ଥିବା ଅଶୋକ ମାନ୍ ନାମକ ଜଣେ ସହଯୋଗୀଙ୍କ ମୃତ୍ୟୁ ଘଟିଥିଲା ଏବଂ ଅନ୍ୟ ଜଣେ କର୍ମୀ ଆହତ ହୋଇଥିଲେ। ଆକ୍ରମଣ ପରେ ନରେଶ କହିଛନ୍ତି ଯେ, ଘଟଣା ଅତ୍ୟନ୍ତ ଦୁର୍ଭାଗ୍ୟପୂର୍ଣ୍ଣ। ମୋ ଉପରେ ହୋଇଥିବା ଆକ୍ରମଣର କାରଣ ଜାଣି ନାହିଁ। କିନ୍ତୁ ଅଚାନକ ଏହି ଆକ୍ରମଣ ହୋଇଥିଲା। 4 ରାଉଣ୍ଡ ଗୁଳି ମାଡ଼ କରାଯାଇଛି। ପୁଲିସ ଠିକ୍ ଭାବେ ତଦନ୍ତ କଲେ ସମସ୍ତ ଆକ୍ରମଣକାରୀଙ୍କ ପରିଚୟ ମିଳିପାରିବ।
