ଓଡ଼ିଶା ଫାଷ୍ଟ(ବ୍ୟୁରୋ): ବାଲେଶ୍ୱରରେ ଆଜି ଏକ ଡିଏଲ୧୨ ସିଇ ୪୩୨୧ ନମ୍ବର କାର ଭାରସାମ୍ୟ ହରାଇ ପୋଲ ତଳକୁ ଖସି ପଡିଥିଲା । ଏହି ଦୁର୍ଘଟଣାରେ ଜଣେ ଦେଢ଼ ବର୍ଷ ଶିଶୁର ମୃତ୍ୟୁ ଘଟିଥିବା ବେଳେ ୫ ଜଣ ଗୁରୁତର ଆହତ ହୋଇଛନ୍ତି ।
ସୂଚନା ଅନୁଯାୟୀ, ବାଲେଶ୍ୱର ଖନ୍ତାପଡ଼ା ଥାନା ଅଧିନସ୍ଥ ପଣପଣା ଗାଁରୁ ଦୁଇଟି ପରିବାରର ୬ଜଣ ସଦସ୍ୟ ବାଲେଶ୍ୱର ଅଭିମୁଖେ ଏକ କାର ରେ ଯାଉଥିଲେ । କାରଟି ଦ୍ରୁତ ଗତିରେ ଯାଉଥିବାରୁ ଭାରସାମ୍ୟ ହରାଇ ଓଳିଆପଟଣାଠାରେ ୧୬ ଫୁଟ ପୋଲ ତଳକୁ ଖସି ପଡ଼ିଥିଲା । କାରଟି ୪ଫୁଟ ପାଣିରେ ଫସିଯିବାରୁ ଘଟଣାସ୍ଥଳରେ ହିଁ ଦେଢ଼ବର୍ଷର ଶିଶୁ ଗୁଡ଼ି ପଲେଇର ମୃତ୍ୟୁ ଘଟିଥିଲା । ଏହି ଦୁର୍ଘଟଣାରେ ପ୍ରଫୁଲ୍ଲ ପଲେଇ (୪୦), ଟିକିଲି ପଲେଇ (୩୨), ରତ୍ନାକର ପ୍ରଧାନ (୩୮), ରଶ୍ମି ପରିଡା (୩୫) ଓ ସୌମ୍ୟରଞ୍ଜନ ପରିଡା (୭) ଗୁରୁତର ଆହତ ହୋଇଛନ୍ତି । ରଶ୍ମି ପରିଡା ଓ ସୌମ୍ୟରଞ୍ଜନ ପରିଡାଙ୍କ ଅବସ୍ଥା ଶୋଚନୀୟ ହେବାରୁ ମା’ ଓ ପୁଅ ଦୁହିଁଙ୍କୁ କଟକ ସ୍ଥାନାନ୍ତର କରାଯାଇଛି ।