ବିହାର ନାଳନ୍ଦା ଜିଲ୍ଲା କୁଲଗାଁ ବୋରୱେଲରେ ଖସିପଡ଼ିଥିବା ୩ ବର୍ଷର ଶିଶୁ ଶିବମକୁ ଉଦ୍ଧାର କରିଛି ଏନଡିଆରଏଫ୍ ଟିମ୍ । ଉଦ୍ଧାର ପରେ ତୁରନ୍ତ ଶିବମକୁ ହସ୍ପିଟାଲକୁ ନିଆଯାଇଛି। ତେବେ ଶିବମର ସ୍ବାସ୍ଥ୍ୟବସ୍ଥା କେମିତି ଅଛି ସେନେଇ ସଠିକ୍ ସୂଚନା ମିଳିପାରିନାହିଁ। ତେବେ ଶିବମ ଜୀବିତଥିବା ଜଣାପଡ଼ିଛି। ସୂଚନାଯୋଗ୍ୟ ଯେ, ଶିବମ ଆଜି ସକାଳେ ଖେଳୁଥିବାବେଳେ ଅଚାନକ ବୋରୱେଲ ଭିତରେ ପଡିଯାଇଥିଲେ ।
ପରେ ଉକ୍ତ ସ୍ଥାନରେ ଲୋକଙ୍କ ଗହଳି ଲାଗିଥିଲା । ଖବର ପାଇ ପୁଲିସ, ଅଗ୍ନିଶମ ବାହିନୀ ଓ ଏନଡିଆରଏଫ ଟିମ୍ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟରେ ଲାଗିପଡିଥିଲେ। ଏହା ସହିତ ଜିଲ୍ଲା ପ୍ରଶାସନ ତରଫରୁ ବୋରୱେଲ ଭିତରକୁ ସିସିଟିଭି କ୍ୟାମେରା ପହଞ୍ଚାଇ ଶିଶୁଟି ଉପରେ ନଜର ରଖିଥିଲା । ଦୀର୍ଘ ସମୟର ଚେଷ୍ଟାପରେ ଏନଡିଆରଏଫ୍ ଶିବମକୁ ଉଦ୍ଧାର କରିଛି।