ଥମିବାର ନାଁ ନଉନି ଯୁଦ୍ଧ ଇସ୍ରାଏଲ ଓ ହମାସ ଯୁଦ୍ଧ। ଗାଜା ଉପରେ ଆଖିବୁଜା ଆକ୍ରମଣ କରିଛି ଇସ୍ରାଏଲ। କେତେବେଳ ଗାଜା ଷ୍ଟ୍ରିପରେ ଇସ୍ରାଏଲ ସ୍ଥଳଭାଗରେ ରହି ଆକ୍ରମଣ କରୁଛି ତ ପୁଣି କେତେ ବେଳେ ଆକାଶ ପଥରେ ମିସାଇଲ ମାଡ଼ କରିବାକୁ ମଧ୍ୟ ପଛାଉ ନାହିଁ। ଶନିବାର ରାତିରେ କେନ୍ଦ୍ରୀୟ ଗାଜାରେ ଥିବା ଏକ ଶରଣାର୍ଥୀ ଶିବିରରେ ଇସ୍ରାଏଲ୍ ବୋମାବର୍ଷଣ ଯୋଗୁଁ ୩୦ରୁ ଊର୍ଦ୍ଧ୍ବ ଲୋକଙ୍କର ମୃତ୍ୟୁ ଘଟିଛି ବୋଲି ହମାସ୍ ପରିଚାଳିତ ସ୍ବାସ୍ଥ୍ୟ ମନ୍ତ୍ରାଳୟ କହିଛି।
ସ୍ବାସ୍ଥ୍ୟ ମନ୍ତ୍ରାଳୟ ମୁଖପାତ୍ର ଅଶ୍ରଫ୍ ଅଲ୍-କୁଦ୍ରା କହିଛନ୍ତି ଯେ କେନ୍ଦ୍ରୀୟ ଗାଜା ଷ୍ଟ୍ରିପ୍ସ୍ଥିତ ଅଲ୍-ମଗାଜୀ ଶିବିରରେ ନରସଂହାର କାରଣରୁ ଦେଇର୍ ଅଲ୍-ବଲାଗସ୍ଥିତ ‘ଅଲ୍-ଅସ୍କା ସହିଦ ଚିକିତ୍ସାଳୟ’ରେ ୩୦ରୁ ଅଧିକ ଶବ ପହଞ୍ଚିଛି। ସେହିପରି ଟେଲିଗ୍ରାମ୍ ରେ ପୋଷ୍ଟ କରିଥିବା ବିବୃତିରେ ହମାସ୍ କହିଛି, ଇସ୍ରାଏଲ୍ ପ୍ରତ୍ୟକ୍ଷଭାବେ ସାଧାରଣ ନାଗରିକମାନଙ୍କ ଘର ଉପରେ ବୋମା ମାଡ଼ କରୁଛି। ଏଥିରେ ଅଧିକାଂଶ ଶିଶୁ ଓ ମହିଳାଙ୍କର ମୃତ୍ୟୁ ହୋଇଛି।
ସେପଟେ କୂଟନୈତିକ ଯାତ୍ରା ପାଇଁ ମଧ୍ୟ ପୂର୍ବରେ ଥିବା ଆମେରିକାର ବୈଦେଶିକ ସଚିବ ଆଣ୍ଟୋନି ବ୍ଲିଙ୍କେନ୍ ଆରବ ନେତାଙ୍କ ସହ ଆଲୋଚନାରେ ଅସନ୍ତୋଷ ହୋଇଛନ୍ତି।
ଆଣ୍ଟୋନି ବ୍ଲିଙ୍କେନ୍ ଦାବି କରିଛନ୍ତି ଯେ, ଘାଟିରେ ସାଧାରଣ ନାଗରିକଙ୍କ ମୃତ୍ୟୁକୁ ରୋକିବା ପାଇଁ ଆମେରିକା ସଂଘର୍ଷ ତଥା ବୋମା ବିସ୍ଫୋରଣରେ ଏକ “ମାନବିକ ବିରତି” କୁ ସମର୍ଥନ କରୁଛି, ତଥାପି ଇସ୍ରାଏଲର ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁ ଅସ୍ତ୍ରବିରତି ଉଲ୍ଲଂଘନ ପାଇଁ କୌଣସି ପରିସରକୁ ଏଡ଼ାଇ ଦେଇଛନ୍ତି।
ଆମେରିକାର ରାଷ୍ଟ୍ରପତି ଜୋ ବାଇଡେନ ନିକଟରେ କହିଛନ୍ତି ଯେ, ଏକ “ମାନବିକ ବିରତି” ହାସଲ କରିବାରେ ଅଗ୍ରଗତି ହୋଇଛି, କିନ୍ତୁ ଏହାର ବିସ୍ତୃତ ବିବରଣୀ ନାହିଁ। ଜୋର୍ଡାନରେ ଏକ ଗଣମାଧ୍ୟମ ସମ୍ମିଳନୀରେ ଆଣ୍ଟୋନି ବ୍ଲିଙ୍କେନ୍ କହିଛନ୍ତି ଯେ, ଏହି ସବୁ ପ୍ରୟାସ ମାନବିକ ବ୍ୟାଘାତକୁ ଦୂର କରିବାରେ ସହାୟକ ହେବ।
ରିପୋର୍ଟ ଅନୁସାରେ ଶନିବାର ରାତିରେ କେନ୍ଦ୍ରୀୟ ଗାଜା ଷ୍ଟ୍ରିପ୍ରେ ଥିବା ମଗାଜୀ ଶରଣାର୍ଥୀ ଶିବିରରେ ଇସ୍ରାଏଲ୍ ଆକ୍ରମଣ ଯୋଗୁଁ ୫୧ଜଣ ପାଲେଷ୍ଟିନୀୟ ମରିଛନ୍ତି। ସେମାନଙ୍କ ମଧ୍ୟରୁ ଅଧିକାଂଶ ହେଉଛନ୍ତି ମହିଳା ଓ ପିଲା। ହାମାସ ଏକ ବିବୃତ୍ତି ଜାରି କରି କହିଛି ଯେ ଯେପର୍ଯ୍ୟନ୍ତ ଇସ୍ରାଏଲ୍ ସେନା ଗାଜା ଷ୍ଟ୍ରିପରୁ ଆହତ ପାଲେଷ୍ଟାଇନୀୟମାନଙ୍କୁ ରାଫା ସୀମା ଦେଇ ଇଜିପ୍ଟକୁ ଚିକିତ୍ସା ପାଇଁ ଅନୁମତି ନ ଦେବ ସେ ପର୍ଯ୍ୟନ୍ତ ବିଦେଶୀମାନଙ୍କୁ ଗାଜା ଛାଡିବାକୁ ଦିଆଯିବ ନାହିଁ।
ସୂଚନା ଅନୁସାରେ ଗତକାଲି ଗାଜା ସହରର ଅଲ-ଶିଫା ହସ୍ପିଟାଲ ବାହାରେ ଥିବା ଆମ୍ବୁଲାନ୍ସ ଉପରେ ଏୟାର୍ ଷ୍ଟାଇକ୍ କରାଯାଇଛି । ଏହି ଏୟାର୍ ଷ୍ଟାଇକ୍ ରେ ପାଖାପାଖି ୧୫ ଜଣଙ୍କର ମୃତ୍ୟୁ ଘଟିଥିବା ବେଳେ ୫୦ରୁ ଅଧିକ ଲୋକ ଆହତ ହୋଇଛନ୍ତି । ତେବେ ଏହି ଆକ୍ରମଣ ପାଇଁ ନିଜକୁ ଦାୟୀ କରିଛି ଇସ୍ରାଏଲ ସେନା । ଇସ୍ରାଏଲ୍ ପ୍ରତିରକ୍ଷା ବାହିନୀ ଏକ ବିବୃତ୍ତି ଜାରି କରି କହିଛି ଯେ, ଅଲ-ଶିଫା ହସ୍ପିଟାଲ ବାହାରେ ଥିବା ଆମ୍ବୁଲାନ୍ସ ଉପରେ ଆକ୍ରମଣ କରାଯାଇଛି । ଏହି ଆମ୍ବୁଲାନ୍ସରେ ହମାସ ଆତଙ୍କୀ ଥିଲେ, ସେଥିପାଇଁ ଏୟାର୍ ଷ୍ଟ୍ରାଇକ୍ କରାଯାଇଛି ।
ଏହାସହ ଯାହା ଜଣାପଡିଛି କି, ଏହି ଆକ୍ରମଣରେ ଅନେକ ହମାସ୍ ଆତଙ୍କବାଦୀ ନିପାତ ହୋଇଛନ୍ତି । ସେହିପରି ଅଲ-ଶିଫା ଡାକ୍ତରଖାନାରେ ଥିବା ପାଲେଷ୍ଟାଇନ ସ୍ୱାସ୍ଥ୍ୟ ମନ୍ତ୍ରଣାଳୟର ମୁଖପାତ୍ର ମଧ୍ୟ ଏହି ଆକ୍ରମଣ ପାଇଁ ଇସ୍ରାଏଲ ସେନାକୁ ଦାୟୀ କରିଥିବା ଜଣାପଡିଛି ।