ଆଜିକାଲି ଝିଅମାନେ ଏତେ ଖରାପ ପୋଷାକ ପିନ୍ଧୁଛନ୍ତି ଯେ, ସେମାନେ ସୁର୍ପଣଖା ଭଳି ଦେଖାଯାଉଛନ୍ତି : ବିଜେପି ରାଷ୍ଟ୍ରୀୟ ମହାସଚିବ କୈଳାଶ ବିଜୟବର୍ଗୀୟ
ଚର୍ଚ୍ଚାରେ ବିଜେପି ରାଷ୍ଟ୍ରୀୟ ମହାସଚିବ କୈଳାଶ ବିଜୟବର୍ଗୀୟଙ୍କ ବିବାଦୀୟ ବୟାନ । ଆଜିକାଲି ଝିଅମାନେ ଏତେ ଖରାପ ପୋଷାକ ପିନ୍ଧୁଛନ୍ତି ଯେ, ସେମାନେ ସୁର୍ପଣଖା ଭଳି ଦେଖାଯାଉଛନ୍ତି ବୋଲି ସେ କହିଛନ୍ତି । ମଧ୍ୟପ୍ରଦେଶର ଇନ୍ଦୋର ଠାରେ ମହାବୀର ଜୟନ୍ତୀ ଅବସରରେ ଏକ ଜୈନ ସମାଜ କାର୍ଯ୍ୟକ୍ରମରେ ଯୋଗଦେଇ ଏଭଳି ମନ୍ତବ୍ୟ ରଖିଛନ୍ତି ବିଜେପି ରାଷ୍ଟ୍ରୀୟ ମହାସଚିବ ।
ତେବେ ତାଙ୍କର ଏହି ବିବୃତିର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ମହାବୀର ଜୟନ୍ତୀ ଅବସରରେ ଉପସ୍ଥିତ ଥିବା ଲୋକଙ୍କୁ ସମ୍ବୋଧନ କରିବା ସମୟରେ ସେ କହିଥିଲେ, “ମୁଁ ଯେତେବେଳେ ରାତି ସମୟରେ ବାହାରକୁ ବାହାରୁଛି, ସେତେବେଳେ ଯୁବକ ଯୁବତୀଙ୍କୁ ନିଶାସକ୍ତ ଅବସ୍ଥାରେ ଦେଖିବାକୁ ପାଉଛି । ସେମାନଙ୍କୁ ଦେଖି ଇଚ୍ଛା ହୁଏ କାରରୁ ବାହାରି ସେମାନଙ୍କୁ ଚାପୁଡ଼ା ମାରିବାକୁ ।
ଝିଅମାନେ ଅତ୍ୟନ୍ତ ଖରାପ ପୋଷାକ ପିନ୍ଧୁଛନ୍ତି । ଭଗବାନ ସେମାନଙ୍କୁ ଏତେ ସୁନ୍ଦର ଶରୀର ଦେଇଛନ୍ତି । ଆମେ ସମସ୍ତେ ମହିଳାଙ୍କୁ ଦେବୀର ଆଖ୍ୟା ଦେଉଥାଉ । ସେମାନେ ଭଦ୍ର ଡ୍ରେସ ପିନ୍ଧିବା ଉଚିତ । ହେଲେ ଏଭଳି କପଡ଼ା ପିନ୍ଧିବା ଦ୍ୱାରା ସେମାନେ ସୁର୍ପଣଖା ଭଳି ଦିଶୁଛନ୍ତି ବୋଲି କହିଛନ୍ତି ବିଜେପି ଦଳର ରାଷ୍ଟ୍ରୀୟ ମହାସଚିବ କୈଳାଶ ବିଜୟବର୍ଗୀୟ । ଏଭଳି ବୟାନ ପାଇଁ ବିରୋଧି ମଧ୍ୟ ତାଙ୍କ ସହ ଶାସକ ଦଳକୁ ଘେରିଥିଲେ । ବିଜେପି ନେତା ଯବାନ ମାନଙ୍କୁ ଅପମାନିତ କରିଥିବା ନେଇ କଂଗ୍ରେସ ଅଭିଯୋଗ କରିଥିଲା । ଏନେଇ ସ୍ପଷ୍ଟୋକ୍ତି ରଖିଥିଲେ କୈଳାଶ ବିଜୟବର୍ଗୀୟ । ସେ କହିଥିଲେ, ଅଗ୍ନିବୀର ମାନେ ସେମାନଙ୍କ କାର୍ଯ୍ୟକାଳ ସରିବା ପରେ ଯେ କୌଣସି ସ୍ଥାନକୁ ଯିବେ, ସେଠାରେ ସେମାନଙ୍କୁ ଅଗ୍ରାଧିକାର ଦିଆଯିବ ବୋଲି ମୁଁ କହିଥିଲି । ସୂଚନାଯୋଗ୍ୟ ଯେ ପୂର୍ବତନ ଲୋକସଭା ବାଚସ୍ପତି ସୁମିତ୍ରା ମହାଜନ ମଧ୍ୟ ଇନ୍ଦୋରରେ ରାତିରେ ବଢ଼ୁଥିବା ଅନୈତିକ କାର୍ଯ୍ୟକଳାପ ନେଇ ପୋଲିସ ଉପରେ ଆପତ୍ତି ଉଠାଇଥିଲେ ।