କ’ଣ ମନ୍ତ୍ରୀ ନବ ଦାସଙ୍କ ହତ୍ୟା ପଛରେ ରହିଛି କୋଇଲା ଲିଙ୍କ ? ସାମ୍ନାକୁ ଆସିଲା ଏଭଳି ତଥ୍ୟ ଯାହାକୁ ନେଇ ଆରମ୍ଭ ହୋଇଛି ଚର୍ଚ୍ଚା
ସ୍ବାସ୍ଥ୍ୟମନ୍ତ୍ରୀ ନବ ଦାସ ହତ୍ୟାକାଣ୍ଡକୁ ନେଇ ଦିନକୁ ଦିନ ନୂଆ ତଥ୍ୟ ସାମ୍ନାକୁ ଆସୁଛି । ଯାହାକୁ ନେଇ ହତ୍ୟାକାଣ୍ଡର ରହସ୍ୟକୁ ଜାଣିବା ପାଇଁ ସମସ୍ତଙ୍କ ମନରେ ଉତ୍କଣ୍ଠା ଲାଗିରହିଛି । ଅନ୍ୟପଟେ ପ୍ରତିଦିନ ନୂଆ ନୂଆ ତଥ୍ୟ ଆସୁଥିବାବେଳେ ହତ୍ୟାର କାରଣ ବର୍ତମାନ ସୁଧହା ଅସ୍ପଷ୍ଟ ରହିଛି । ଏହାରି ମଧ୍ୟରେ ମୁଖ୍ୟ ଅଭିଯୁକ୍ତ ଗୋପାଳ ଦାସଙ୍କର କୋଇଲା ବେପାର ଲିଙ୍କ୍ ଥିବା ଖବର ସାମ୍ନାକୁ ଆସିଛି।
ଶୁକ୍ରବାର କ୍ରାଇମବ୍ରାଞ୍ଚ ଅଧିକାରୀମାନେ ଗାନ୍ଧୀ ଛକ ଫାଣ୍ଡି ଭିତରେ ଥିବା ଏକ ଭେର୍ନା କାର୍ (ଓଆର୍ ୧୫ ଏମ୍ ୪୨୬୩)କୁ ଜବତ କରିଛନ୍ତି। ଯେଉଁ କାର୍ ରେ ଗୋପାଳ ଦାସ ଚଢ଼ୁଥିଲେ। ତେବେ କଥାଟି ହେଲା ଉକ୍ତ କାର୍ଟି ଜଣେ କୋଇଲା କଣ୍ଟ୍ରାକ୍ଟର ବା ଠିକାଦାରଙ୍କର। ଏହି କାର୍ରେ ଗୋପାଳ ବିଭିନ୍ନ ସ୍ଥାନକୁ ଯାଆନ୍ତି। ହେଲେ କାହିଁକି ଓ କେଉଁ ସ୍ବାର୍ଥ ସାଧନ ହେଉଥିବା କାରଣରୁ ସଂପୃକ୍ତ କୋଇଲା ଠିକାଦାର ଏହି କାର୍କୁ ଗୋପାଳଙ୍କୁ ଦେଇଥିଲେ ଓ ଗୋପାଳଙ୍କ ସହିତ ତାଙ୍କର ସଂପର୍କ କେତେ ନିବିଡ଼, ତାହା ତଦନ୍ତସାପେକ୍ଷ। କେବଳ ସେତିକି ନୁହେଁ, ଏହି ହତ୍ୟାକାଣ୍ଡ ସହିତ ସଂପୃକ୍ତ କୋଇଲା ଠିକାଦାରଙ୍କର କିଛି ସଂପର୍କ ଅଛି କି ନାହିଁ, ତାହା ଉପରେ କ୍ରାଇମବ୍ରାଞ୍ଚ ଅଧିକାରୀମାନେ ଖୋଳତାଡ଼ ଆରମ୍ଭ କରିଛନ୍ତି। ଏଥିସହିକ ମନ୍ତ୍ରୀଙ୍କ ହତ୍ୟା ପଛରେ କୋଇଲା ମାଫିଆଙ୍କ ହାତ ନାହିଁ
ତ? ଏମିତି ଗୋଟିଏ ପ୍ରଶ୍ନ ଏବେ ବିଭିନ୍ନ ମହଲରେ ଚର୍ଚ୍ଚାର ବିଷୟ ହେଲାଣି। ଅନ୍ୟପଟେ ପୋଲିସ ହାତରେ ଲାଗିଛି ଗୋପାଳଙ୍କ ଡାଏରି, ଯେଉଁଥିରେ ଅନେକ କିଛି ରୋଚକ ତଥ୍ୟ ଥିବା କୁହାଯାଉଛି।
ତେବେ ଘଟଣାକୁ ୬ଦିନ ବିତିଯାଇଥିଲେ ବି ଏ ଯାବତ ହତ୍ୟାକାଣ୍ଡର କାରଣ ରହସ୍ୟ ଘେରରେ ଥିବା ନେଇ ସମସ୍ତଙ୍କ ମନରେ ନାନା ପ୍ରଶ୍ନ ଉଙ୍କି ମାରୁଛି ।