ବଲିଉଡ ଜଗତରୁ ଆସିଛି ଏକ ଆଶ୍ଚର୍ଯ୍ୟକର ଏବଂ ଦୁଃଖଦ ଖବର । ଭେଟେରାନ ଅଭିନେତ୍ରୀ ବୀଣା କପୁରଙ୍କ ହତ୍ୟା ହୋଇଥିବା ନେଇ ଅଭିଯୋଗ ଆସିଛି । ତେବେ ୭୪ ବର୍ଷ ବୟସରେ ତାଙ୍କୁ ହତ୍ୟା କରାଯାଇଥିବା ନେଇ ଅଭିଯୋଗ ହୋଇଛି । ସବୁଠୁ ଆଶ୍ଚର୍ଯ୍ୟକର ଘଟଣା ହେଉଛି ଏହି ହତ୍ୟର ମୁଖ୍ୟ ଅଭିଯୁକ୍ତ ହେଉଛି ବୀଣାଙ୍କ ପୁଅ, ଯାହାକୁ ପୋଲିସ ଏବେ ଗିରଫ କରିଛି । ଏ ନେଇ ତଦନ୍ତ କାର୍ଯ୍ୟ ଆଗକୁ ବଢାଇଛି ପୋଲିସ ।
ସୂଚନା ଅନୁସାରେ, ଜୁହୁରେ ଜଣେ ମହିଳାଙ୍କ ହତ୍ୟା ପରେ ଏକ ମୃତଦେହ ମିଳିବା ଘଟଣା ସୋସିଆଲ ମିଡିଆରେ ଭାଇରାଲ ହେବାରେ ଲାଗିଥିଲା । ତେବେ ପରେ ଏହା ବୀଣାଙ୍କ ମୃତଦେହ ବୋଲି ଜାଣିବାକୁ ମିଳିଛି । ଅଭିନେତ୍ରୀ ନୀଲୁ କୋହଲି ଏକ ପୋଷ୍ଟ କରି ବୀଣାଙ୍କ ପାଇଁ ଏକ ଲମ୍ବା ନୋଟ ଲେଖିଛନ୍ତି । ଏହି ପୋଷ୍ଟରେ ଅନେକ ସେଲିବ୍ରିଟି ସେମାନଙ୍କ ପ୍ରତିକ୍ରିୟା ରଖିଛନ୍ତି ।
ଏହି ପୋଷ୍ଟ ସେୟାର କରି ନୀଲୁ ଲେଖିଛନ୍ତି ଯେ, ବୀଣା, ତୁମେ ବହୁତ ଭଲ, ମୋ ହୃଦୟ ଭାଙ୍ଗି ଯାଇଛି, ତୁମ ପାଇଁ ଏହା ଲେଖୁଛି, ମୁଁ କ’ଣ କହିବି, ଆଜି ମୁଁ ନିରବ, ଏତେ ବର୍ଷର ସଂଘର୍ଷ ପରେ ମୁଁ ଆଶା କରେ ତୁମକୁ ଶେଷରେ ଶାନ୍ତି ମିଳୁ। ଅଭିନେତ୍ରୀ ବୀଣା କପୁରଙ୍କ ଦୁଇଟି ପୁଅ ଅଛନ୍ତି। ସେମାନଙ୍କ ମଧ୍ୟରୁ ଜଣେ ଆମେରିକାର ସଫ୍ଟୱେୟାର ଇଞ୍ଜିନିୟର ହୋଇଥିବା ବେଳେ ଅନ୍ୟ ପୁଅର ନାମ ସଚିନ୍। ଖବର ଅନୁଯାୟୀ ପୁଅ ସଚିନ ଅଭିନେତ୍ରୀଙ୍କୁ ହତ୍ୟା କରିଥିବା ଅଭିଯୋଗ ହୋଇଛି ଏବଂ ପୋଲିସ ମଧ୍ୟ ଏହି ମାମଲାରେ ଚାକରକୁ ଗିରଫ କରିଛି।