ଭୁବନେଶ୍ୱର: ଗତକାଲି ଏକ ସାମ୍ବାଦିକ ସମ୍ମିଳନୀରେ ବିଜେଡି ଦ୍ୱାରା କଂଗ୍ରେସ ନେତା ଶ୍ରୀ ଭକ୍ତ ଚରଣ ଦାସଙ୍କ ବିଷୟରେ ସତ୍ୟାସତ୍ୟ ପଦାକୁ ଆସିବା ପରେ ଓଡିଶା କଂଗ୍ରେସ ଭୟଭୀତ ଓ ଚିନ୍ତିତ ହୋଇପଡ଼ିଛି । ଆଜି ପୁଣିଥରେ ଓଡିଶା କଂଗ୍ରେସ ବିନା ପ୍ରମାଣରେ ଭିତ୍ତିହୀନ ଓ କୁତ୍ସିତ ଅଭିଯୋଗ ଉଠାଇଛି ବୋଲି କହିଛନ୍ତି ବିଜେଡି ମୁଖପାତ୍ର ଚିନ୍ମୟ ସାହୁ । କଂଗ୍ରେସ ସାମ୍ବାଦିକ ସମ୍ମିଳନୀର ଜବାବ ଦେଇ ବିଜେଡି ମୁଖପାତ୍ର ଶ୍ରୀ ସାହୁ କହିଛନ୍ତି ଯେ ଯଦି
କଂଗ୍ରେସ ନିକଟରେ କୌଣସି ପ୍ରମାଣ ଅଛି, ତେବେ ସେମାନେ ଏହାକୁ କୋର୍ଟକୁ ଦିଅନ୍ତୁ ଏବଂ କୋର୍ଟ ଏହା ଉପରେ ନିଷ୍ପତ୍ତି ଗ୍ରହଣ କରିବେ । ଏହା ନକରି କେବଳ ଶସ୍ତା ରାଜନୀତି ପାଇଁ ସେମାନେ ମନଗଢା
କାହାଣୀରେ ଲିପ୍ତ ଅଛନ୍ତି । ଗତକାଲି, ଯେହେତୁ ଆମର ରାଷ୍ଟ୍ରୀୟ ମୁଖପାତ୍ର ଡକ୍ଟର ସସ୍ମିତ ପାତ୍ର ଏକ ସାମ୍ବାଦିକ ସମ୍ମିଳନୀରେ
କଂଗ୍ରେସ ନେତା ଶ୍ରୀ ଭକ୍ତ ଦାସ ମହାଲିଙ୍ଗ କଳେଜ ସହ ଜଡିତ ଥିବାର ସତ୍ୟ ଉନ୍ମୋଚନ କରିଥିଲେ ତେଣୁ ଆଜି ଓଡିଶା କଂଗ୍ରେସ ଡକ୍ଟର ସସ୍ମିତ ପାତ୍ରଙ୍କ ସ୍ୱର୍ଗୀୟ ପିତାଙ୍କ ଉପରେ ବ୍ୟକ୍ତିଗତ ଆକ୍ରମଣ କରିଛି । ଆମ ଓଡିଆ ସଂସ୍କୃତିର ପରମ୍ପରା ହେଉଛି ସ୍ୱର୍ଗୀୟ ଆତ୍ମାକୁ ସମ୍ମାନ ଦେବା ଏବଂ ଶାନ୍ତି ପାଇଁ ପ୍ରାର୍ଥନା କରିବା । ଆଜି ସ୍ୱର୍ଗରେ ଥିବା ଜଣେ ଅମର ଆତ୍ମାଙ୍କୁ ଅସମ୍ମାନ କରିବାକୁ ଚେଷ୍ଟା କରି ଓଡିଶା କଂଗ୍ରେସ ଏକ ଜଘନ୍ୟ ପାପ କରିଛି । ଆମେ ଆଶା କରୁଛୁ ସ୍ୱର୍ଗୀୟ ଆତ୍ମାକୁ ଅସମ୍ମାନ କରିବାର ଏହି ଘୃଣ୍ୟ ପାପ ପାଇଁ ଭଗବାନ ଓଡିଶା
କଂଗ୍ରେସକୁ କ୍ଷମା କରିବେ, ଜଣେ ବ୍ୟକ୍ତି, ଯାହାଙ୍କର ଦେହାନ୍ତ ହୋଇଯାଇଛି ସେ ଆଉ ନିଜ ପକ୍ଷ ରଖିବା ପାଇଁ ସ୍ୱର୍ଗରୁ ଫେରି ପାରିବେ ନାହିଁ ବୋଲି ବିଜେଡି ମୁଖପାତ୍ର ଶ୍ରୀ ସାହୁ କହିଛନ୍ତି ।
