ଓଡ଼ିଶା ଫାଷ୍ଟ(ବ୍ୟୁରୋ): ଆଜି ସକାଳ ୯ଟାରେ କେନ୍ଦ୍ରାପଡ଼ା ଜିଲ୍ଲା ମାର୍ଶାଘାଇ ଥାନା ଅଧିନସ୍ଥ ମଣିଗୁଣ୍ଡା ଗାଁ ରାସ୍ତାରେ ଫୁଟିଛି ଗୁଳି । ଏହି ଗୁଳିକାଣ୍ଡରେ ଗଗନ ସାହୁ ନାମକ ଜଣେ ଔଷଧ ବ୍ୟବସାୟୀଙ୍କ ମୃତ୍ୟୁ ଘଟିଛି । ପୋଲିସ ଶବ ଜବତ କରିବା ସହ ଘଟଣାର ତଦନ୍ତ ଆରମ୍ଭ କରିଛି ।
ସୂଚନା ଅନୁଯାୟୀ, କେନ୍ଦ୍ରାପଡ଼ା ଜିଲ୍ଲା ମାର୍ଶାଘାଇ ଥାନା ଅଧିନସ୍ଥ ମଣିଗୁଣ୍ଡା ଗାଁର ଔଷଧ ବ୍ୟବସାୟୀ ଗଗନ ସାହୁ ନିଜ ବ୍ୟକ୍ତିଗତ କାର୍ଯ୍ୟରେ କେନ୍ଦ୍ରାପଡା ଯାଉଥିଲେ । ଏହି ସମୟରେ ଦୁଇଜଣ ଯୁବକ ଗଗନଙ୍କ ପିଛା କରିବା ସହ ନିଛାଟିଆ ସ୍ଥାନ ଦେଖି ତାଙ୍କ ଉପରକୁ ଗୁଳି ଚାଳନା କରିଥିଲେ । ଗୁଳିମାଡରେ ଗଗନ ଗୁରୁତର ଆହତ ହୋଇ ତଳେ ପଡ଼ିଯାଇଥିଲେ । ଏହାପରେ ଦୁର୍ବୃତମାନେ ସେ ସ୍ଥାନରୁ ଖସି ପଳାଇଥିଲେ ।
ଗୁଳିକାଣ୍ଡ ଖବର ପାଇ ପୋଲିସ ଘଟଣା ସ୍ଥଳରେ ପହଞ୍ଚି ଗୁରୁତର ଅବସ୍ଥାରେ ଗଗନଙ୍କୁ ଉଦ୍ଧାର କରି ହସପିଟାଲରେ ଭର୍ତ୍ତି କରିଥିଲା । ଚିକିତ୍ସାଧୀନ ଅବସ୍ଥାରେ ଗଗନଙ୍କ ମୃତ୍ୟୁ ଘଟିଥିଲା । କିଏ ଓ କାହିଁକି ଏଭଳି ହତ୍ୟାକାଣ୍ଡ ଘଟାଇଲା, ତାହାକୁ ନେଇ ପୋଲିସ ତଦନ୍ତ କରୁଛି । ଏହି ହତ୍ୟାକାଣ୍ଡ ପଛରେ ପୂର୍ବ ବିବାଦ କିମ୍ବା ଦାଦାବଟି ବିବାଦ ଥିବା ସନ୍ଦେହ କରୁଛି ପୋଲିସ ।