ଓଡ଼ିଶା ଫାଷ୍ଟ(ବ୍ୟୁରୋ): ରାଜ୍ୟ ସରକାର ସବୁ କ୍ଷେତ୍ରରେ ଭୁଲ ତଥ୍ୟ ପ୍ରଦାନ କରୁଛନ୍ତି ବୋଲି ପ୍ରେସ୍ମିଟ୍ରେ ଅଭିଯୋଗ ଆଣିଛନ୍ତି କଂଗ୍ରେସର ବରିଷ୍ଠ ନେତା ନରସିଂହ ମିଶ୍ର । ସେ କହିଛନ୍ତି, ବିଭିନ୍ନ ପ୍ରସଙ୍ଗରେ ଗୃହରେ ପ୍ରଶ୍ନ ପଚରା ଯାଉଥିଲେ ବି ଠିକ୍ ଉତ୍ତର ମିଳୁନାହିଁ । ପଞ୍ଚମ ଥର ପାଇଁ ଜିତିବା ପରେ ବିଜେଡିର ଅହଂକାର ବଢ଼ିଯାଇଛି । ଅହଂକାର ବଢ଼ିଲେ ବିନାଶ ନିଶ୍ଚିତ ବୋଲି ନରସିଂହ କହିଛନ୍ତି । ଏଥିସହ ସେ କହିଛନ୍ତି, ବିଭିନ୍ନ ପ୍ରଶ୍ନର ଉତ୍ତରରେ ମନ୍ତ୍ରୀମାନେ ଭୁଲ୍ ତଥ୍ୟ ପ୍ରଦାନ କରୁଥିବା ବେଳେ ବାଚସ୍ପତି ଏଥିରେ ହସ୍ପକ୍ଷେପ କରୁନାହାନ୍ତି ।
ରାଜ୍ୟରେ ମରୁଡ଼ି ପରିସ୍ଥିତି ସୃଷ୍ଟି ହୋଇଥିଲେ ବି ସରକାର ଏହାକୁ ମାନୁନାହାନ୍ତି । ସେହିପରି ରାଜ୍ୟରେ ନାବାଳିକା ବଳାତ୍କାରରେ ଓଡ଼ିଶା ଦେଶରେ ଆନୁପାତିକ ଭାବେ ପ୍ରଥମ । ଏ ସମ୍ପର୍କରେ ପ୍ରଶ୍ନ ପଚାରିଲେ ମୁଖ୍ୟମନ୍ତ୍ରୀ କହୁଛନ୍ତି ଆଇନ ଶୃଙ୍ଖଳା ସ୍ଥିତି ଠିକ୍ ଅଛି । ଏଥିସହ ଯେ କୌଣସି ବିଷୟରେ ପ୍ରଶ୍ନ ପଚାରିଲେ ସରକାର ବାଆଁରଉଛନ୍ତି ବୋଲି ନରସିଂହ କହିଛନ୍ତି । ତେବେ ନାରୀ ନିର୍ଯାତନା ଓ ନାବାଳିକା ନିଖୋଜକୁ ନେଇ ଆସନ୍ତା କାଲି କଂଗ୍ରେସ ବିକ୍ଷୋଭ କରିବ । ପ୍ରତ୍ୟେକ ଜିଲାର ସଦର ମହକୁମାରେ ଆସନ୍ତା କାଲି ସକାଳ ୧୦ଟାରୁ ଅପରାହ୍ନ ୧ଟା ପର୍ଯ୍ୟନ୍ତ ବିକ୍ଷୋଭ କରାଯିବ ବୋଲି ସୂଚନା ମିଳିଛି ।