ଓଡିଶା ଫାଷ୍ଟ(ବ୍ୟୁରୋ): ଓଡ଼ିଶାରେ ରୌଦ୍ରତାପ ଯେତେ ବଢୁଛି ରାଜନୀତି ତାତି ମଧ୍ୟ ସେତିକି ବଢ଼ିବାରେ ଲାଗିଛି । କାରଣ ସିଲଭର ସିଟି ରେ ଆଜି ସନ୍ଧ୍ୟାରେ ଦେଖିବାକୁ ମିଳିବ ଦୁଇଟି ଗ୍ରାଣ୍ଡ ରୋଡ଼ ସୋ । ଗୋଟାଏ ପଟେ ବିଜେଡି ସୁପ୍ରିମୋ ନବୀନ ପଟ୍ଟନାୟକ ତ ଅନ୍ୟପଟେ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହା ।
ତୃତୀୟ ପର୍ଯ୍ୟାୟ ନିର୍ବାଚନୀ ପ୍ରଚାର ପାଇଁ ଆଜି ଟକ୍କର ହେବ ବିଜେଡି ଓ ବିଜେପିର କଟକରେ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହା ମଧ୍ୟରେ ହେବାକୁ ଥିବା ଟକ୍କରକୁ ଦେଖିବାକୁ ସାଧାରଣ ଜନତାଙ୍କ ମଧ୍ୟରେ ଖୁବ ଉତ୍ସାହ ।
ସୂଚନା ଅନୁଯାୟୀ, ମୁଖ୍ୟମନ୍ତ୍ରୀ ଆଜି ମୟୁରଭଞ୍ଜ ଜିଲ୍ଲାର କରଞ୍ଜିଆ ଠାରୁ ପ୍ରଚାର ଆରମ୍ଭ କରିଛନ୍ତି । ଏହି ପ୍ରଚାର କରଞ୍ଜିଆ ଠାରୁ କେନ୍ଦୁଝର ଓ କେନ୍ଦୁଝର ଠାରୁ ସିଧାସଳଖ କଟକରେ ପହଞ୍ଚିବ । କଟକରେ ମୁଖ୍ୟମନ୍ତ୍ରୀଙ୍କ ଏକ ବିଶାଳ ରୋଡ୍ ସୋ କରିବାର କାର୍ଯ୍ୟକ୍ରମ ରହିଛି । ନରାଜ ଠାରେ ହୋଇଥିବା ହେଲିପ୍ୟାଡରେ ପହଞ୍ଚିବା ପରେ ମୁଖ୍ୟମନ୍ତ୍ରୀଙ୍କ ରୋଡ ସୋ କାର୍ଯ୍ୟକ୍ରମ ଆରମ୍ଭ ହେବ । ଏହି ରୋଡ ସୋ ସିଡିଏ ରାସ୍ତା ଦେଇ ଯିବା ସମୟରେ ଦେବାଶିଷ ସାମନ୍ତରାୟ, ଚନ୍ଦ୍ର ସାରଥୀ ବେହେରା ଓ ସୌଭିକ୍ ବିଶ୍ୱାଳଙ୍କ ପାଇଁ ମୁଖ୍ୟମନ୍ତ୍ରୀ ପ୍ରଚାର କରି ଜନତାଙ୍କୁ ବିଜେଡି ପ୍ରାର୍ଥୀଙ୍କୁ ଭୋଟ ଦେବାକୁ ନିବେଦନ କରିବେ । ଏହାପରେ ମୁଖ୍ୟମନ୍ତ୍ରୀ ରୋଡ଼ ସୋ କରି ଭୁବନେଶ୍ୱର ଅଭିମୁଖେ ଯାତ୍ରା କରିବା ପରେ ଭୁବନେଶ୍ୱରରେ ମଧ୍ୟ ମେଗା ରୋଡ୍ ସୋ’ କରିବାର କାର୍ଯ୍ୟକ୍ରମ ରହିଛି ।