ଉତ୍ତରପ୍ରଦେଶର ଜାଲୌନ୍ ଜିଲ୍ଲାର ମାଧବଗଡ ଅଞ୍ଚଳରେ ଆଜି ସକାଳେ ଏକ ହୃଦୟ ବିଦାରକ ଘଟଣା ଘଟିଛି । ବରଯାତ୍ରୀ ନେଇ ଯାଉଥିବା ଏକ ବସ୍ ଏକ ଅଜଣା ଗାଡି ସହ ମୁହାଁମୁହିଁ ଧକ୍କା ହେବା ଫଳରେ ୫ ଜଣଙ୍କର ମୃତ୍ୟୁ ଘଟିଛି । ଏଥିସହ ୧୭ ଜଣ ଗୁରୁତର ଆହତ ହୋଇଛନ୍ତି । ଆହତମାନଙ୍କୁ ଚିକିତ୍ସା ପାଇଁ ଡାକ୍ତରଖାନାରେ ଭର୍ତ୍ତି କରାଯାଇଛି ।
ଜଣେ ପୋଲିସ ଅଧିକାରୀ କହିଛନ୍ତି ଯେ, ମେ ୬ ତାରିଖ ଶନିବାର ମଣ୍ଡେଲା ଗ୍ରାମରୁ ଏକ ବରଯାତ୍ରୀ ଦଳ ଏକ ବସ୍ ଯୋଗେ ରାମପୁରା ଅଂଚଳର ଦୁତାବାଲି ଆସିଥିଲେ । ଏହି ବସ୍ ରବିବାର ଭୋର ପ୍ରାୟ ୩ ଟା ବେଳେ ମଣ୍ଡେଲାକୁ ଫେରୁଥିଲା । ବସ୍ ମାଧବଗଡର ଗୋପାଳପୁରା ଗ୍ରାମ ନିକଟରେ ପହଞ୍ଚିଥିବା ବେଳେ ଏକ ଅଜ୍ଞାତ ଗାଡି ଏହାକୁ ଧକ୍କା ଦେଇଥିଲା । ଫଳରେ ଏହା ଭାରସାମ୍ୟ ହରାଇ ଏକ ଗଭୀର ଖାଇରେ ପଡ଼ିଯାଇଥିଲା । ଏହି ଘଟଣାରେ ୧୭ ଜଣ ଆହତଙ୍କୁ ଓରାଇ ମେଡିକାଲ କଲେଜକୁ ପଠାଯାଇଥିବା ପୋଲିସ ଅଧୀକ୍ଷକ କହିଛନ୍ତି । ଶବଗୁଡ଼ିକୁ ପୋଷ୍ଟମର୍ଟମ ପାଇଁ ପଠାଯାଇଛି ବୋଲି ସେ କହିଛନ୍ତି । ଆହତ ଯାତ୍ରୀଙ୍କ ସୂଚନା ପାଇଁ ପୋଲିସ ହେଲ୍ପ ଲାଇନ ନମ୍ବର ଜାରି କରିଛି।