ଓଡ଼ିଶା ଫାଷ୍ଟ(ବ୍ୟୁରୋ): କରୋନା ସଂକ୍ରମଣ ତଳମୁହାଁ ହୋଇଥିବାରୁ ତ୍ରିସ୍ତରୀୟ ପଞ୍ଚାୟତ ନିର୍ବାଚନ ପରେ ପୌର ନିର୍ବାଚନ ନେଇ ଅଣ୍ଟା ଭିଡ଼ିଲେଣି ରାଜ୍ୟ ସରକାର । ଏଥିପାଇଁ ଜୋରଦାର ପ୍ରସ୍ତୁତି ଆରମ୍ଭ ହେଲାଣି। ଏହିକ୍ରମରେ ଭୁବନେଶ୍ୱର, କଟକ ଓ ବ୍ରହ୍ମପୁର ମେୟର ପଦବୀ ପାଇଁ ସଂରକ୍ଷଣ ତାଲିକା ମଧ୍ୟ ଚୂଡ଼ାନ୍ତ ହୋଇଛି। ନଗର ଉନ୍ନୟନ ବିଭାଗ ପକ୍ଷରୁ ଏନେଇ ବିଧିବଦ୍ଧ ଚୂଡ଼ାନ୍ତ ବିଜ୍ଞପ୍ତି ପ୍ରକାଶ ପାଇଛି। ଏହି ସଂରକ୍ଷଣର ଚିଠା ତାଲିକା ପ୍ରକାଶ କରି ନଗର ଉନ୍ନୟନ ବିଭାଗ ଆପତ୍ତି ଓ ଅଭିଯୋଗ ଆହ୍ୱାନ କରିଥିଲା।ଏପ୍ରିଲ, ମେ’ ସୁଦ୍ଧା ପୌର ନିର୍ବାଚନ ହେବ ବୋଲି ନଗର ଉନ୍ନୟନ ବିଭାଗ ସୂଚନା ଦେଇଛି ।
ନଗର ଉନ୍ନୟନ ବିଭାଗ ପକ୍ଷରୁ ପ୍ରକାଶିତ ବିଜ୍ଞପ୍ତି ଅନୁଯାୟୀ, ଭୁବନେଶ୍ୱର ଓ ବ୍ରହ୍ମପୁର ମେୟର ପଦବୀ ମହିଳାଙ୍କ ପାଇଁ ସଂରକ୍ଷିତ ରହିଥିବା ବେଳେ କଟକ ମେୟର ପଦବୀ ଅଣସଂରକ୍ଷିତ ରହିଛି । ଏହା ଚୂଡ଼ାନ୍ତ ବିଜ୍ଞପ୍ତିରେ ସ୍ପଷ୍ଟ କରାଯାଇଛି। ମାତ୍ର ଏଥର ପଛୁଆ ବର୍ଗଙ୍କ ପାଇଁ କୌଣସି ସଂରକ୍ଷଣ ବ୍ୟବସ୍ଥା ରହିନାହିଁ।
ଅପରପକ୍ଷରେ ୩ ମହାନଗରର ୱାର୍ଡ ସୀମା ନିର୍ଦ୍ଧାରଣ କରାଯାଇଛି । ବ୍ରହ୍ମପୁର, କଟକ, ଭୁବନେଶ୍ୱର ପାଇଁ ଓ୍ୱାର୍ଡ ସୀମା ନିର୍ଦ୍ଧାରଣ ଚୂଡ଼ାନ୍ତ ହୋଇଛି । ସୀମା ନିର୍ଦ୍ଧାରଣ ସହ ପ୍ରକାଶ ପାଇଛି ଚୂଡ଼ାନ୍ତ ସଂରକ୍ଷଣ ତାଲିକା। ବ୍ରହ୍ମପୁରର ମୋଟ୍ ୪୨ଟି ଓ୍ୱାର୍ଡରୁ ୨୩ଟି ଓ୍ୱାର୍ଡ ସଂରକ୍ଷିତ ରହିଛି । କଟକରେ ମୋଟ୍ ୫୯ଟି ଓ୍ୱାର୍ଡରୁ ୩୩ଟି ୱାର୍ଡ ସଂରକ୍ଷିତ ରହିଛି । ଭୁବନେଶ୍ୱରର ୬୭ଟି ଓ୍ୱାର୍ଡରୁ ୩୮ଟି ସଂରକ୍ଷିତ ନେଇ ତାଲିକା ପ୍ରକାଶ ପାଇଛି ।
ଭୁବନେଶ୍ୱର ମହାନଗର ନିଗମର ୬୭ ୱାର୍ଡ ମଧ୍ୟରୁ ୩୮ଟି ରିଜର୍ଭସନ ରହିବ। ଏହା ମଧ୍ୟରୁ ଅନୁସୂଚିତ ଜାତିର ମହିଳା ପାଇଁ ୩, ଅନୁସୂଚିତ ଜାତି ପାଇଁ ୩ , ଅନୁସୂଚିତ ଜନଜାତିର ମହିଳାଙ୍କ ପାଇଁ ୨ଟି, ଅନୁସୂଚିତ ଜନଜାତି ପାଇଁ ଗୋଟିଏ ଆସନ ରହିଛି। ଅନ୍ୟ ସବୁ ମହିଳାଙ୍କ ପାଇଁ ସଂରକ୍ଷିତ ହୋଇ ରହିବ।
କଟକ ମହାନଗର ନିଗମରେ ୫୯ ୱାର୍ଡ ମଧ୍ୟରୁ ୩୩ଟି ରିଜର୍ଭସନ ରହିବ। ଏହା ମଧ୍ୟରୁ ଅନୁସୂଚିତ ଜାତିର ମହିଳା ପାଇଁ ୪ , ଅନୁସୂଚିତ ଜାତି ପାଇଁ ୩ଟି ସିଟ୍, ଅନୁସୂଚିତ ଜନଜାତିର ମହିଳା ପାଇଁ ଗୋଟିଏ ଆସନ ସଂରକ୍ଷିତ ରହିବ। ବଳକା ସଂରକ୍ଷିତ ସିଟ୍ରେ ମହିଳାମାନେ ପ୍ରାର୍ଥୀ ହେବେ। ସେହିପରି କଟକର ବାକି ୱାର୍ଡ ଅଣସଂରକ୍ଷିତ ରହିଛି।
ସେହିପରି ବ୍ରହ୍ମପୁର ମହାନଗର ନିଗମର ୪୮ଟି ୱାର୍ଡ ମଧ୍ୟରୁ ୨୩ଟି ରିଜର୍ଭସନ ରହିବ। ଅନୁସୂଚିତ ଜାତି ବର୍ଗର ମହିଳାଙ୍କ ପାଇଁ ୨ଟି, ଅନୁସୂଚିତ ଜନଜାତି ପାଇଁ ୨, ଅନୁସୂଚିତ ଜନଜାତି ମହିଳା ପାଇଁ ଗୋଟିଏ ଆସନ ସଂରକ୍ଷିତ ରହିଛି। ସେହିପରି ବଳକା ଆସନଗୁଡ଼ିକରେ କେବଳ ମହିଳା ପ୍ରାର୍ଥୀ ଲଢ଼େଇ କରିପାରିବେ।