ଭୁବନେଶ୍ୱର/ଜଟଣୀ, : ଗୁରୁବାର ବିଳମ୍ବିତ ରାତିରେ ଜଟଣୀରେ ଏକ ଜଘଂନ୍ୟ ହତ୍ୟାକାଣ୍ଡ ଘଟିଛି । ଯୁବକଙ୍କ ଖଣ୍ଡା-ଭୂଜାଲି ଚୋଟରେ ଜଟଣୀ ବିକାଶ ନଗରରେ ରହୁଥିବା ମାନସ ଦଳେଇଙ୍କର ମୃତ୍ୟୁ ଘଟିଛି । ହତ୍ୟାକାଣ୍ଡର ପ୍ରକୃତ କାରଣ ଅସ୍ପଷ୍ଟ ଥିବା ବେଳେ ଟଙ୍କା ଭାଗ-ବଣ୍ଟାକୁ ନେଇ ଏଭଳି ଘଟିଥିବା ସନ୍ଦେହ କରାଯାଉଛି । ପୋଲିସ ସାଇଣ୍ଟିଫିକ୍ ଟିମ ସହ ଘଟଣାସ୍ଥଳରେ ପହଞ୍ଚି ତଦନ୍ତ ଚଳାଇଛି ।
ସୂଚନା ଅନୁସାରେ, ଗତକାଲି ରାତି ପ୍ରାୟ ସାଡେ ଗୋଟାଏ ବେଳେ ମାନସଙ୍କୁ କେହି ଫୋନ କରି ଡାକିଥିଲେ । ପରେ ମାନସ ତାଙ୍କ କାର (ଓଡି୦୨-ବିଟି-୩୮୧୮) ଯୋଗେ ଦୁଇ ସହଯୋଗୀଙ୍କ ସହ ଷଣ୍ଢପୁର ସ୍ଥିତ ଆଦର୍ଶ ସ୍କୁଲ ପାଖକୁ ଯାଇଥିଲେ । ସେଠାରେ ଥିବା ୫/୬ଜଣଙ୍କ ସହ ତାଙ୍କର କୌଣସି କଥାକୁ ନେଇ ପାଟିତୁଣ୍ଡ ହୋଇଥିଲା । ପରେ ସେମାନେ ଖଣ୍ଡ ଓ ଭୂଜାଲିରେ ଅତର୍କିତ ଆକ୍ରମଣ କରିଥିଲେ । ଫଳରେ ଘଟଣାସ୍ଥଳରେ ମାନସଙ୍କର ମୃତ୍ୟୁ ଘଟିଥିବା ବେଳେ ଅନ୍ୟଜଣେ ସହଯୋଗୀ ଗୁରୁତର ଆହତ ହୋଇଛନ୍ତି । ଖବରପାଇ ପୋଲିସ ପହଞ୍ଚି ଶବ ଜବତ କରିବା ସହ ଘଟଣାର ତଦନ୍ତ ଆମ୍ଭ କରିଛି ।
ତେବେ ଏହି ହତ୍ୟାକାଣ୍ଡ ପଛରେ ଟଙ୍କା ଭାଗ-ବଣ୍ଟା ହିଁ ମୁଖ୍ୟ କାରଣ ବୋଲି କୁହାଯାଉଛି । କାରଣ ମାନସ ଜଟଣୀରେ ଏକ ଗ୍ରୁପ କରି ଜମି ଦଖଲ ଦେବା ସହ ଠିକାଦାରି କରୁଥିଲା । ଏପରିକି ଏକ ଗୁଣ୍ଡାବାହିନୀ ମଧ୍ୟ ଗଢିଥିଲା । ତେବେ ଏହି ବାବଦରେ ଆସୁଥିବା ଟଙ୍କାର ସିଂହଭାଗ ମାନସ ପାଖକୁ ଯାଉଥିଲା । ଏହାକୁ ନେଇ ଗ୍ରୁପ ଭିତରେ ଅସନ୍ତୋଷ ରହିଥିଲା । ଗତକାଲି ଗ୍ରୁପର ଜଣେ ସଦସ୍ୟ ତାଙ୍କୁ ଫୋନ କରି ଟଙ୍କା ଭାଗନେବାକୁ ଡାକିଥିଲେ । ସେ ଆସିବା ପରେ ସେଠାରେ ଭାଗ-ବଣ୍ଟାକୁ ନେଇ ପାଟିତୁଣ୍ଡ ହୋଇଥିଲା ଓ ପରେ ତାଙ୍କୁ ପୂର୍ବ ଯୋଜନା ଅନୁଯାୟୀ ହତ୍ୟା କରାଯାଇଥିବା ସନ୍ଦେହ କରାଯାଉଛି । ପୋଲିସ ଏହି ଦିଗକୁ ଗୁରୁତର ସହ ନେଇ ଛାନଭିନ କରୁଛି ।
ଉଲ୍ଲେଖଥାଉ କି, ମାନସ ନାଁରେ ଏକାଧିକ ଅପରାଧୀକ ମାମଲା ରହିଛି । ଏକାଧିକ ଥର ସେ ଗିରଫ ହୋଇ ସେ ଜେଲ ଯାଇଛି । ତେଣୁ ହତ୍ୟାକାଣ୍ଡ ପଛରେ ଅନ୍ୟ କିଛି କାରଣ ବି ଥାଇପାରେ ବୋଲି ପୋଲିସ ସନ୍ଦେହ କରୁଛି ।