ମୁଦ୍ରାସ୍ଫୀତି କ୍ଷେତ୍ରରେ ସାଧାରଣ ଜନତାଙ୍କୁ ଆଉ ଏକ ବଡ଼ ଝଟକା ଲାଗିଛି କହିଲେ ଭୁଲ୍ ହେବ ନାହିଁ । କାରଣ ଏଲପିଜି ଗ୍ୟାସ ସିଲିଣ୍ଡରର ମୂଲ୍ୟ ବୃଦ୍ଧି ପାଇଛି। ଘରୋଇ ଗ୍ୟାସ ସିଲିଣ୍ଡର ଏବଂ ଉଜ୍ଜ୍ୱଳା ଯୋଜନାରେ ପ୍ରଦାନ କରାଯାଉଥିବା ସିଲିଣ୍ଡର ଉପରେ ପ୍ରତି ସିଲିଣ୍ଡର ପିଛା ୫୦ ଟଙ୍କା ବଢାଯାଇଛି । କେନ୍ଦ୍ର ପେଟ୍ରୋଲିୟମ ମନ୍ତ୍ରୀ ହରଦୀପ ସିଂହ ପୁରୀ ସୋମବାର ଦିନ ରନ୍ଧନ ଗ୍ୟାସ୍ ତଥା ଏଲପିଜିର ମୂଲ୍ୟ ପ୍ରତି ସିଲିଣ୍ଡର ପିଛା ୫୦ ଟଙ୍କା ବୃଦ୍ଧି ହେବା ନେଇ ଘୋଷଣା କରିଛନ୍ତି। ମନ୍ତ୍ରୀଙ୍କ କହିବାନୁଯାୟୀ, ଉଜ୍ଜ୍ୱଳା ଏବଂ ସାଧାରଣ ବର୍ଗର ଗ୍ରାହକଙ୍କ ପାଇଁ ଗ୍ୟାସର ମୂଲ୍ୟ ବୃଦ୍ଧି କରାଯାଇଛି। ଆଜି ମଧ୍ୟରାତ୍ରିରୁ ନୂଆଦର ଲାଗୁ କରାଯିବ ।
ସାଧାରଣ ଗ୍ରାହକଙ୍କ ପାଇଁ ୧୪.୨ କିଲୋଗ୍ରାମ ଏଲପିଜି ସିଲିଣ୍ଡରର ମୂଲ୍ୟ ୮୦୩ ଟଙ୍କାରୁ ୮୫୩ ଟଙ୍କାକୁ ବୃଦ୍ଧି ପାଇବ । ଏଥିସହ ଉଜ୍ଜ୍ୱଳା ଯୋଜନା ଅଧୀନରେ ଗ୍ରାହକଙ୍କ ପାଇଁ ୧୪.୨ କିଲୋଗ୍ରାମ ସିଲିଣ୍ଡରର ମୂଲ୍ୟ ୫୦୩ ଟଙ୍କାରୁ ୫୫୩ ଟଙ୍କାକୁ ବୃଦ୍ଧି ପାଇବ ବୋଲି ସୂଚନା ମିଳିଛି ।
ମନ୍ତ୍ରୀ ହରଦୀପ ସିଂହ ପୁରୀ ଆହୁରୀ ମଧ୍ୟ କହିଛନ୍ତି ଯେ, “ପ୍ରତି ସିଲିଣ୍ଡର ଏଲପିଜିର ମୂଲ୍ୟ ୫୦ ଟଙ୍କା ବୃଦ୍ଧି କରାଯିବ । ୫୦୦ ଟଙ୍କାରୁ ଏହା ୫୫୦ ଟଙ୍କା (ପିଏମୟୁୱାଇ ହିତାଧିକାରୀଙ୍କ ପାଇଁ) ଏବଂ ଅନ୍ୟ ହିତାଧିକାରୀଙ୍କ ପାଇଁ ଏହା ୮୦୩ ଟଙ୍କାରୁ ୮୫୩ ଟଙ୍କାକୁ ବୃଦ୍ଧି ପାଇବ । ଏହି ପଦକ୍ଷେପକୁ ଆମେ ଆହୁରି ସମୀକ୍ଷା କରିବୁ ବୋଲି ମନ୍ତ୍ରୀ କହିଛନ୍ତି । ଆମେ ପ୍ରତି ୨-୩ ସପ୍ତାହ ପର୍ଯ୍ୟନ୍ତ ଏହାର ସମୀକ୍ଷା କରୁଛୁ । ଉତ୍ପାଦ ଶୁଳ୍କ ବୃଦ୍ଧି ତଥା ପେଟ୍ରୋଲ ଏବଂ ଡିଜେଲର ଗ୍ରାହକଙ୍କ ଉପରେ ଲଦି ଦିଆଯିବ ନାହିଁ। ସେହି ଉତ୍ପାଦ ଶୁଳ୍କ ବୃଦ୍ଧିର ଉଦ୍ଦେଶ୍ୟ ହେଉଛି ତେଲ ମାର୍କେଟିଂ କମ୍ପାନୀଗୁଡ଼ିକୁ ଗ୍ୟାସ ଯୋଗୁଁ ହରାଇଥିବା ୪୩,୦୦୦ କୋଟି ଟଙ୍କାର କ୍ଷତିପୂରଣ ଦେବା…”
ମନ୍ତ୍ରୀଙ୍କ କହିବାନୁସାରେ “ଆପଣ ଅର୍ଥ ମନ୍ତ୍ରଣାଳୟର ଏକ ବିଜ୍ଞପ୍ତି ଦେଖିଥିବେ ଯେଉଁଥିରେ ଏହା କୁହାଯାଇଛି ଯେ, ପେଟ୍ରୋଲ ଏବଂ ଡିଜେଲ ଉପରେ ଉତ୍ପାଦ ଶୁଳ୍କ ୨ ଟଙ୍କା ବୃଦ୍ଧି କରାଯାଉଛି । ମୁଁ ପୂର୍ବରୁ ସ୍ପଷ୍ଟ କରିଦେଉଛି ଯେ, ଏହି ବୋଝ ଗ୍ରାହକଙ୍କ ଉପରେ ଲଦାଯିବ ନାହିଁ।”
ଆପଣଙ୍କୁ କହିରଖୁଛୁ ଯେ, ଆନ୍ତର୍ଜାତୀୟ ସ୍ତରରେ ଅଶୋଧିତ ତୈଳର ମୂଲ୍ୟ ବ୍ୟାରେଲ ପିଛା ପ୍ରାୟ $60 କୁ ହ୍ରାସ ପାଇଛି, କିନ୍ତୁ ଆମର ତୈଳ ବିପଣନ କମ୍ପାନୀଗୁଡ଼ିକ ୪୫ ଦିନ ପାଇଁ ଷ୍ଟକ୍ ରଖନ୍ତି। ଯଦି ଆପଣ ଜାନୁଆରୀ ମାସ ବିଷୟରେ କଥା ହୁଅନ୍ତି, ତେବେ ସେହି ସମୟରେ ଅଶୋଧିତ ତୈଳର ମୂଲ୍ୟ $83 ଥିଲା, ଯାହା ପରେ $75 କୁ ହ୍ରାସ ପାଇଥିଲା। ତେଣୁ ସେମାନଙ୍କ ପାଖରେ ଥିବା ଅଶୋଧିତ ତୈଳ ଷ୍ଟକ୍ ହାରାହାରି $75 ପ୍ରତି ବ୍ୟାରେଲ। ଆପଣ ଆଶା କରିପାରିବେ ଯେ ତୈଳ ବିପଣନ କମ୍ପାନୀଗୁଡ଼ିକ ବିଶ୍ୱ ଦର ସହିତ ପେଟ୍ରୋଲ ଏବଂ ଡିଜେଲର ମୂଲ୍ୟ ହ୍ରାସ କରିବେ।”