କୁହାଯାଏ ଭାରତର ଆତ୍ମା ଗାଁରେ ରହିଥାଏ। ଏପରି କିଛି ଗ୍ରାମ ଅଛି ଯାହା କେବଳ ଦେଶରେ ନୁହେଁ ସମଗ୍ର ବିଶ୍ୱରେ ସେମାନଙ୍କର ବିଶେଷ କାରଣ ହେତୁ ପ୍ରସିଦ୍ଧ। ହିମାଚଳ ପ୍ରଦେଶରେ ମଧ୍ୟ ଏଭଳି ଏକ ଗାଁ ଅଛି, ଯାହା ଅତ୍ୟନ୍ତ ରହସ୍ୟମୟ ଅଟେ। ଏହି ଗାଁର ଲୋକମାନେ ଏଭଳି ଭାଷାରେ କଥାବାର୍ତ୍ତା କରନ୍ତି, ଯାହାକୁ ଏଠାକାର ଲୋକଙ୍କ ବ୍ୟତୀତ ଅନ୍ୟ କେହି ବୁଝନ୍ତି ନାହିଁ।ଗାଁଟିର ନାମ ହେଉଛି ମାଲାଣା। ପ୍ରାୟ ୧୭୦୦ ଜନସଂଖ୍ୟା ବିଶିଷ୍ଟ ଏହି ଗାଁ ପର୍ଯ୍ୟଟକମାନଙ୍କ ମଧ୍ୟରେ ବହୁତ ପ୍ରସିଦ୍ଧ। ପୃଥିବୀର ବିଭିନ୍ନ ସ୍ଥାନରୁ ଲୋକମାନେ ଏଠାକୁ ବୁଲିବାକୁ ଆସନ୍ତି। ମାଲାଣାରେ ପହଞ୍ଚିବା ଅତ୍ୟନ୍ତ କଷ୍ଟକର। ଏହି ଗାଁକୁ କୌଣସି ପକା ରାସ୍ତା ନାହିଁ , କେବଳ ପାର୍ବତ୍ୟ ପଥ ଦେଇ ଯିବାକୁ ପଡିଥାଏ। କୁହାଯାଏ ଯେ ଯେତେବେଳେ ସିକନ୍ଦର ଭାରତ ଉପରେ ଆକ୍ରମଣ କରିଥିଲେ, ସେତେବେଳେ ତାଙ୍କର କିଛି ସୈନିକ ମାଲାଣା ଗାଁରେ ଆଶ୍ରୟ ନେଇଥିଲେ ଏବଂ ପରେ ସେମାନେ ସେଠାରେ ରହିବାକୁ ଲାଗିଲେ। ଏଠାରେ ରହୁଥିବା ବାସିନ୍ଦା ସିକନ୍ଦରର ସେହି ସୈନିକଙ୍କ ବଂଶଜ ବୋଲି କୁହାଯାଏ। ତଥାପି ଏହି କଥା ଏପର୍ଯ୍ୟନ୍ତ ସମ୍ପୂର୍ଣ୍ଣ ପ୍ରମାଣିତ ହୋଇନାହିଁ। କିନ୍ତୁ ସିକନ୍ଦରଙ୍କ ସମୟର ଅନେକ ଜିନିଷ ମାଲାଣା ଗାଁରେ ଦେଖିବାକୁ ମିଳେ। କୁହାଯାଏ ଯେ ସିକନ୍ଦର ଯୁଗର ଖଣ୍ଡା ମଧ୍ୟ ଏହି ଗାଁର ମନ୍ଦିରରେ ରହିଛି।ମାଲାଣା ଗାଁର ଲୋକମାନେ କାନାଶି ନାମକ ଏକ ନିଆରା ଭାଷା କୁହନ୍ତି, ଯାହା ଅତ୍ୟନ୍ତ ରହସ୍ୟମୟ ଅଟେ। ସେମାନେ ଏହାକୁ ଏକ ପବିତ୍ର ଭାଷା ଭାବରେ ବିବେଚନା କରନ୍ତି। ଏହାର ବିଶେଷ କଥା ହେଉଛି ଏହି ଭାଷା ମାଲାଣା ବ୍ୟତୀତ ଅନ୍ୟ କୌଣସି ସ୍ଥାନରେ କଥାବାର୍ତ୍ତା ହୁଏ ନାହିଁ। ଏହି ଭାଷା ମାଲାଣା ଗାଁ ବ୍ୟତୀତ ବାହାର ଲୋକଙ୍କୁ ଶିଖାଯାଏ ନାହିଁ। ଏହି ବିଷୟରେ ଅନେକ ଦେଶରେ ଗବେଷଣା କରାଯାଉଥିଲେ ମଧ୍ୟ କୌଣସି ସୁଫଳ ମିଳିନାହିଁ।ମାଲାଣାର ପୁରୁଖା ଲୋକମାନେ ବାହାର ଲୋକଙ୍କ ସହ ହାତ ମିଳାଇବା ଏବଂ ସେମାନଙ୍କୁ ଛୁଇଁବାକୁ ବାରଣ କରନ୍ତି। ଯଦି ଆପଣ ଏଠାରେ ଦୋକାନରୁ କିଛି ସାମଗ୍ରୀ କିଣୁଛନ୍ତି, ତେବେ ଦୋକାନୀ ଏହାକୁ ଆପଣଙ୍କ ହାତରେ ଦେବା ପରିବର୍ତ୍ତେ ସେଠାରେ ରଖିବେ ଏବଂ ସେହି ସମୟରେ ସେ ଟଙ୍କାକୁ ତାଙ୍କ ହାତରେ ରଖିବା ପରିବର୍ତ୍ତେ ତଳେ ରଖିବାକୁ କୁହନ୍ତି। ସମୟ କ୍ରମେ ଏହାର ପ୍ରଭାବ ସେଠାରେ କମ ଦେଖିବାକୁ ମିଳୁଛି, ଏଠାରେ ନୂତନ ପିଢି ଏହି ସବୁ ଜିନିଷ ଗ୍ରହଣ କରୁନାହାନ୍ତି। ବାହାର ଲୋକଙ୍କ ସହ କଥାବାର୍ତ୍ତା କରିବା, ହାତ ମିଳାଇବା କିମ୍ବା ଆଲିଙ୍ଗନ କରିବାରେ ଏବେକା ଯୁବପିଢିମାନଙ୍କର କୌଣସି ବିଶେଷ ଆପତି ନାହିଁ ।ଆପଣ ଜାଣି ଆଶ୍ଚର୍ଯ୍ୟ ହେବେ ଯେ ଏହି ଗାଁର ଲୋକମାନେ ମଧ୍ୟ ନିଜ ଗାଁ ଭିତରେ ବିବାହ କରନ୍ତି। ଯଦି କେହି ଗାଁ ବାହାରେ ବିବାହ କରନ୍ତି, ତେବେ ତାଙ୍କୁ ସମାଜରୁ ବାହାର କରି ଦିଆଯାଏ। ତେବେ ଏଭଳି ମାମଲା କ୍ୱଚିତ୍ ଦେଖିବାକୁ ମିଳିଛି, ପ୍ରାୟ ସମସ୍ତେ ସେହି ଗାଁରେ ବିବାହ କରନ୍ତି। ମାଲାଣା ଗାଁରରେ ଚରସ ମଧ୍ୟ ବେଶ ପ୍ରସିଦ୍ଧ। ଏହି ଗାଁର ଲୋକମାନେ ଚରସକୁ ହାତରେ ଘଷି ପ୍ରସ୍ତୁତ କରିବା ପରେ ତାହାକୁ ବାହାର ଲୋକଙ୍କୁ ବିକ୍ରି କରନ୍ତି। ଏହି ଗାଁର ଲୋକମାନଙ୍କ ପୋଷାକ ଖାଦ୍ୟ ପାନ୍ୟ ମଧ୍ୟ ଭିନ୍ନ ହୋଇଥାଏ।
