ଭୁବନେଶ୍ୱର : ଅସୁରକ୍ଷିତ ହୋଇ ପଡ଼ିଲାଣି ରାଜଧାନୀ ଭୁବନେଶ୍ୱର । କେତେବେଳେ ବୋମା ମାଡ଼ ତ କେତେବେଳେ ବିଚ୍ ରାସ୍ତାରେ ଗୋଡ଼ାଇ ଗୋଡ଼ାଇ ହାଣୁଛନ୍ତି ଦୁର୍ବୃତ୍ତ । ଗତକିଛି ଦିନ ହେଲା ଏଭଳି ଅପରାଧ ରାଜଧାନୀବାସୀଙ୍କ ନିଦ ହଜାଇ ଦେଇଛନ୍ତି । ତେବେ ଗତକାଲି ରାତିରେ ଏପରି ଏକ ଘଟଣା ରାଜଧାନୀର ପଳାସପଲ୍ଲୀ ଅଂଚଳରେ ଗତ ରାତିରେ ଘଟିଛି । ପୋଲିସ ଘଟଣାର ତଦନ୍ତ ଆରମ୍ଭ କରିଛି ।
ସୂଚନା ଅନୁସାରେ, ଏୟାରପୋର୍ଟ ଥାନା ପଲାସପଲ୍ଲୀ ଲେନ-୧୦ରେ ସମାଜସେବୀ ଶିବପ୍ରସାଦ ଶ୍ରୀଚନ୍ଦନ ରୁହନ୍ତି । ଗତକାଲି ରାତି ପ୍ରାୟ ୧୦ଟା ବେଳେ ସେ ପଳାସପଲ୍ଲୀ ଛକରୁ ସ୍କୁଟି ଯୋଗେ ନବୀନ ନିବାସ ରାସ୍ତାରେ ଯାଉଥିଲେ । ଏହି ସମୟରେ ଦୁଇଟି ବାଇକ୍ ତାଙ୍କ ଆଗରେ ଛିଡ଼ା ହୋଇଥିଲା । ଶିବ ସ୍କୁଟି ଅଟକାଇବାରୁ ହଠାତ୍ ଦୁର୍ବୃତ୍ତମାନେ ଖଣ୍ଡା ବାହାର କରି ତାଙ୍କୁ ହାଣି ପକାଇଥିଲେ । ଫଳରେ ତାଙ୍କ ଶରୀରର ବିଭିନ୍ନ ସ୍ଥାନରେ ଗଭୀର କ୍ଷତ ସୃଷ୍ଟି ହୋଇଛି ।
ଶିବ ପ୍ରସାଦ ତଳେ ପଡ଼ି ଛଟପଟ ହେବାରୁ ଦୁର୍ବୃର୍ତ୍ତମାନେ ଘଟଣାସ୍ଥଳରୁ ଫେରାର ହୋଇ ଯାଇଥିଲେ । ଗୁରୁତର ଶିବଙ୍କ ଚିତ୍କାର ଶୁଣି ସ୍ଥାନୀୟ ଲୋକେ ପହଞ୍ଚି ତାଙ୍କୁ ପ୍ରଥମେ କ୍ୟାପିଟାଲ୍ ହସ୍ପିଟାଲ୍ରେ ଭର୍ତ୍ତି କରିଥିଲେ । ।ପରେ ତାଙ୍କୁ ଏମ୍ସକୁ ସ୍ଥାନାନ୍ତର କରାଯାଇଛି । ଖବରପାଇ ପୋଲିସ ଘଟଣାସ୍ଥଳରେ ପହଞ୍ଚି ଖୋଳତାଡ ଆରମ୍ଭ କରିଛି । ସିସିଟିଭି ଫୁଟେଜକୁ ଆଧାର କରି ପୋଲିସ ଅଭିଯୁକ୍ତଙ୍କୁ ଚିହ୍ନ କରିବାକୁ ଉଦ୍ୟମ କରୁଛି । ଏଥିସହିତ ଦୁଇ ଜଣ ଅଭିଯୁକ୍ତଙ୍କୁ ଅଟକ ରଖି ବପଚରାଉଚରା କରୁଛି । ଏଥିସହିତ କମିଶନର ଏସ ଦେବଦତ୍ତ ସିଂ ଗତକାଲି ବିଳମ୍ବିତ ରାତିରେ ଏମ୍ସ ଯାଇ ଶିବପ୍ରସାଦଙ୍କ ସ୍ୱାସ୍ଥ୍ୟବସ୍ଥା ପଚାରି ବୁଝିଛନ୍ତି ।